काठमाडौं । गत चैत १५ गते राजावादीले काठमाडौंको तीनकुने क्षेत्रमा गरेको प्रदर्शनका क्रममा भएको हिंसात्मक घटनामा संलग्न रहेको आरोपमा पक्राउ परेका राष्ट्रिय प्रजातन्त्र पार्टीका महामन्त्री धवलशमशेर जबरालाई आज प्रहरीले रिहा गर्ने भएको छ ।
जवरालाई रिहा गर्न जिल्ला प्रहरी परिसर काठमाडौँले धवलकी पत्नी प्रतिमा राणालाई बोलाएको छ ।
अहिले राप्रपाा नेता तथा कार्यकर्ताहरु पनि जिल्ला प्रहरी परिसर काठमाडौंमा पुगेका छन् । राणालाई हिजै रिहा गर्ने भनिए पनि आवश्यक प्रक्रिया पूरा हुन ढिलाइ भएपछि आज मात्र रिहा गर्न लागिएको हो ।
जिल्ला प्रहरी परिसर काठमाडौँको सिफारिसमा सरकारी वकिलको कार्यालय काठमाडौँले धवललाई हाजिर जमानीमा छाड्न लागेको हो ।
क्यान्सरका बिरामी राणाको नियमित फलोअप गर्नका लागि भारत जानुपर्ने भएकाले उनलाई हाजिर जमानीमा छाड्ने तयारी भएको स्रोतको भनाइ छ । स्रोतका उनको बयान पूरा भइसकेको छ भने अब मुद्दा लैजाँदा लैजाने गरी अहिलेलाई हाजिर जमानीमा छाड्ने तयारी भएको हो ।
