बलिउडकी दिग्गज गायिका लता मङ्गेशकरलाई कोरोना भाइरस पोजेटिभ देखिएको छ । सङ्क्रमित भएपछि उनलाई मुम्बईको ब्रीच क्यान्डी अस्पतालको आईसीयूमा भर्ना गरिएको छ । लतालाई हल्का लक्षण देखिए पनि उनको स्वास्थ्य भने ठीक रहेको परिवारले बताएको छ ।
उनको स्वास्थ्य राम्रो रहे पनि उमेरका हिसाबले सावधानी अपनाउन उनलाई आईसीयूमा राखिएको छ । उनको उपचार भइरहेको छ । लताकी भदैनी रचनाले पनि उनको स्वास्थ्यका बारेमा समाचार एएनआईलाई जानकारी दिँदै उनको गोपनीयताको ख्याल गर्न र उनको शीघ्र स्वास्थ्यलाभको लागि प्रार्थना गर्न अपील गरिन्। उनले भनिन, “कृपया हाम्रो गोपनीयताको सम्मान गर्नुहोस् र दिदीलाई प्रार्थनामा राख्नुहोस्।”
जानकारीअनुसार ९२ वर्षीय गायिकालाई सन् २०१९ को नोभेम्बर महिनामा सास फेर्न समस्या भएको थियो । त्यतिबेला पनि उनलाई अस्पताल भर्ना गर्नुपरेको थियो । तर स्वास्थ्यमा सुधार आएपछि उनलाई डिस्चार्ज गरिएको थियो । त्यो बेला पनि भारत कोभिडसँग लडिरहेको थियो।
लता मङ्गेशकरले गत वर्ष सेप्टेम्बरमा आफ्नो ९२ औँ जन्मदिन मनाएकी थिइन् । उनको सुस्वास्थ्य र दीर्घायुको कामना सबैतिरबाट भएको थियो । लता सामाजिक सञ्जालमा निकै सक्रिय छिन् । त्यहाँ उनी प्रायः आफ्ना फ्यानहरूका लागि पुराना तस्विर र रोचक किस्साहरू सेयर गर्ने गर्छिन्। उनले पद्मभूषण, पद्मविभूषण, दादासाहेब फाल्के र राष्ट्रिय चलचित्र पुरस्कार जितिसकेकी छन् ।
अहिले भारतमा पुनः कोरोना भाइरस फैलिएको छ । कोरोनाको तेस्रो लहरले धेरै कलाकारलाई समाइसकेको छ । ऋतिक रोशनकी पूर्वपत्नी सुजैन खान, जोन अब्राहम, प्रेम चोपडा, नोरा फतेही, एकता कपूर, दृष्टि धामीलगायत धेरै चर्चित सेलिब्रेटी कोरोना सङ्क्रमित भएका छन् ।
