काठमाडौं । ललितपुरको पाटन अस्पतालमा उपचाररत कोरोना भाइरस संक्रमित जनकपुरकी २८ वर्षीया महिलाको मृत्यु भएको छ । स्वास्थ्य कार्यालय ललितपुरले उनको मृत्यु बुधबार भएको पुष्टि गरेको छ । यही साउन १८ गते उनी पाटन अस्पतालमा भर्ना भएकी थिइन् ।
गएराति बुटवलको कोरोना विशेष अस्पतालमा कपिलवस्तुको तौलिहवाका एक जना कोरोना संक्रमितको मृत्यु भएको थियो । यसैगरी मंगलबार राति नै सप्तरीको डाक्नेश्वरी नगरपालिका वडा नं. ८ का संक्रमितको मृत्यु भएको थियो ।
यससँगै नेपालमा कोरोना संक्रमणबाट मृत्यु हुनेको संख्या ८६ पुगेको छ ।