काठमाडौँ । अध्यागमन विभागले कोभिड–१९ को नयाँ भेरिएन्ट ओमिक्रोनको सङ्क्रमण रोकथामका लागि नेपाल प्रवेश गर्न रोक लगाइएको ट्राभल एडभाइजरीको व्यवस्थालाई यथावत राखेको छ ।
ओमिक्रोनको सङ्क्रमण देखिएका दक्षिण अफ्रिका, बोत्स्वाना, जिम्बाब्वे, नामिबिया, लेसोथो, इरुवाटिनी, मोजाम्बिक, मलावी र हङकङबाट नेपाल आउने वा ती मुलुकलाई ट्रान्जिट बनाइ नेपाल आउने वा गएको तीन साताभित्र ती मुलुकको भ्रमण गरेका यात्रुलाई गत मङ्सिर १६ गते राति १२ बजेदेखि नेपाल प्रवेश गर्न रोक लगाएको थियो । विभागले एक सूचना जारी गर्दै उल्लिखित नौ मुलुकलगायत सङ्क्रमणका जोखिम भएका अन्य मुलुकबाट नेपाल आउने नेपाली नागरिक र कूटनीतिक वा अफिसियल पासपार्टबाहक वा आवासीय भिसा प्राप्त गरेका विदेशी नागरिकहरुका सम्बन्धमा विभिन्न व्यवस्था गरेको जनाएको छ ।
विभागले नयाँ भेरिएन्टको सङ्क्रमणको जोखिम भएका मुलुकहरुमा नेपालबाट यात्रा गर्न योजना बनाएका व्यक्तिहरुले अति आवश्यक अवस्थाबाहेक यात्रा नगर्न अनुरोध गरेको छ । ओमिक्रोनको सङ्क्रमणको अवस्थाका आधारमा स्वास्थ्य तथा जनसङ्ख्या मन्त्रालयले जोखिमयुक्त मुलुकको पहिचान गरी विभागलाई प्राप्त हुने जानकारीका आधारमा त्यस्ता मुलुकहरुका सम्बन्धमा पुनः ट्राभल एड्भाइजरी जारी गर्ने उल्लेख गरेको छ ।
