काठमाडौँ। युवा तथा खेलकुदमन्त्री तेजुलाल चौधरीले निजी विद्यालयले नेपाल स्काउटलाई प्राथमिकतामा राख्न अनुरोध गर्नुभएको छ ।
निजी तथा आवासीय विद्यालय सङ्गठन नेपाल (प्याब्सन)को १६औँ राष्ट्रिय महाधिवेशनको आज यहाँ उद्घाटन गर्दै उहाँले स्काउटले विद्यार्थीलाई अनुशासनमा राख्नुका साथै हरेक क्षेत्रमा अगाडि बढ्न सहयोग गर्ने बताउनुभयो । मन्त्री चौधरीले मन्त्रालयले निजी विद्यालयमा सात दिनको तालिमका लागि प्रशिक्षक पठाउन तयार रहेको बताउनुभयो ।
प्याब्सनले विद्यालयस्तरमा खेलकुद गराएमा त्यसले राष्ट्रिय तथा अन्तरराष्ट्रिय स्तरका खेलाडी उत्पादन गर्न सहयोग मिल्ने उहाँको भनाइ थियो । मन्त्री चौधरीले निजी विद्यालयले खेलाडीका छोराछोरीलाई खेलकुद मन्त्रालय वा राष्ट्रिय खेलकुद परिषद्को सिफारिसमा छात्रवृत्ति उपलब्ध गराउन आग्रह गर्नुभयो ।
लुम्बिनी प्रदेशका स्वास्थ्यमन्त्री खेमवहादुर शाहले निजी विद्यालयले प्राविधिक शिक्षामा लगानी गर्नुपर्नेमा जोड दिनुभयो । नेपाली कांग्रेसका कोषाध्यक्ष उमेश श्रेष्ठले नेपालमा राम्रो शिक्षा भए पनि विदेशिने क्रम बढेकाले सरकारले विद्यार्थीलाई विदेशिन नदिने वातावरण सिर्जना गर्नुपर्ने बताउनुभयो । उहाँले विदेशी विश्वविद्यालयको सम्बन्धन लिएर मुलुकमै शिक्षा प्रदान गर्नुपर्ने धारणा राख्नुभयो ।
कांग्रेसका केन्द्रीय सदस्य नैनसिंह महरले निजी लगानीलाई सुनिश्चित हुने गरी निःशुल्क शिक्षा व्यवस्था हुनुपर्नेमा जोड दिनुभयो । राष्ट्रिय परीक्षा बोर्डका अध्यक्ष महाश्रम शर्माले निजी विद्यालयलाई अहिले विकल्प दिन नसकिने भएकाले हरेक विद्यालयले दिने शिक्षा समान हुनुपर्ने बताउनुभयो ।
कार्यक्रममा नेपाल शिक्षक महासङ्घका अध्यक्ष लक्ष्मण किशोर सुवेदीले शिक्षक, विद्यालय र विद्यार्थीमैत्री शिक्षा ऐन जारी गर्नुपर्नेमा जोड दिनुभयो । अभिभावक महासङ्घका अध्यक्ष सुप्रभात भण्डारीले प्याब्सनले विद्यार्थीलाई विदेश जानबाट रोकेकाले शिक्षा ऐन सबैलाई समेट्ने हुनुपर्नेमा जोड दिनुभयो ।
प्याब्सनका अध्यक्ष डिके ढुङ्गानाले उच्च शिक्षाका लागि विदेशिने क्रम बढेकाले सरकारले उचित निर्णय नलिने हो भने अझ बढ्ने बताउनुभयो । मङ्गलबारसम्म चल्ने महाधिवेशनले तीन वर्षका लागि नयाँ नेतृत्व चयन गर्नेछ । महाधिवेशनमा देशभरिका एक हजार पाँच सय दुई जना प्रतिनिधि सहभागी छन् ।
