काठमाडौँ । प्रधानमन्त्री केपी शर्मा ओलीले मुलुकमा आन्तरिक रोजगारीको सिर्जना गर्न सरकारले उद्यमशीलतालाई प्राथमिकतामा राखेर काम गरिरहेको बताउनुभएको छ ।
सोमवार काठमाडौंमा आयोजित श्रम तथा रोजगार सम्मेलनलाई सम्बोधन गर्दै प्रधानमन्त्री ओलीले यस्तो बताउनुभएको हो । उहाँले सरकारले नीति तथा कार्यक्रममै रोजगारी प्रवद्र्धन दशक घोषणा गरेको उल्लेख गर्दै यो लगानी र रोजगारी अभिवृद्धि दशक हुने बताउनु भयो । उहाँले सन् २०३० सम्ममा उद्यमशीलता र आधुनिकीकरणमार्फत सोचेभन्दा बढी रोजगारीका अवसर सिर्जना गर्न सकिने बताउनु भयो ।
नेपालमा काम अनुसारको पारिश्रमिक नपाउँदा श्रमिकहरु विदेशी गइरहेका कारण श्रम बजार र पारिश्रमिकबीच सन्तुलन कायम गर्नु आजको आवश्यकता रहेको बताउनु भयो ।
उहाँले भन्नुभयो, ‘हामीले अहिले उद्यमशीलतामा जोड दिनुपर्छ । हाम्रो अहिलेको फोकस भनेको उद्यमशीलता हो । हामीले रोजगारी प्रवद्र्धन दशक भनेका छौं । त्यो भनेको उत्पादकत्व वृद्धि दशक हो । लगानी र अभिवृद्धि दशक हो । जसले रोजगारीका अवसरहरु सिर्जना गर्दछ । सन् २०३० सम्ममा नेपालमा राजगारीका अजसरहरु हामीले सोचेभन्दा बढी सिर्जना गर्नुपर्दछ उद्यमशीलताको मार्फत, आधुनिकीकरणको मार्फत । कृषिको आधुनिकीकरण गर्नसक्यो भने त्यहीबाट उद्यमशीलताको अभिवृद्धि गर्न सकिन्छ । त्यहीबाट आम्दानी बढी हुन्छ ।’
उहाँले सरकार फलाम र तेल खानीको उत्खनन गर्ने तयारीमा रहेको समेत बताउनु भयो । उहाँले फलाम खानीमार्फत नेपाललाई स्टिल र फलामजन्य धातुमा आत्मनिर्भर बनाउन सकिने बताउनु भयो । उहाँले श्रम पलायन रोक्दै मुलुकभित्रै रोजगारीका अवसर सिर्जना गर्न निजी क्षेत्रको महत्वपूर्ण योगदान रहेको समेत बताउनु भयो । उहाँले उद्यमशीलताको विकास गरी परिस्थितिमा परिवर्तन ल्याउन र समृद्ध नेपाल, सुखी नेपालीको राष्ट्रिय आकांक्षा पूरा गर्न सरकार लागिरहेको उल्लेख गर्दै निजी क्षेत्रको सहयोग अपरीहार्य रहेको समेत बताउनु भयो ।
उहाँले भन्नुभयो, ‘हामीले भन्दै आएका छौं निजी क्षेत्रले अर्थतन्त्रलाई लिड गर्छ भनेर । श्रमिकलाई मुलुकभित्रै रोजगारी गर्न प्रोत्साहन गर्नको लागि तपाईहरुले काम गर्न सक्नुहोस् । यस काममा सरकारले सहयोग गर्छ । यो त सरकारको कर्तव्य हो । रोजगारीको अवसर सिर्जना गर्दै स्थितिमा सुधार ल्याउनु सरकारको दायित्व हो ।’
काम गरेर जीविका चलाउने स्थिति नभएका कारण श्रमिक पलायन बढिरहेको उहाँको भनाइ छ ।
