काठमाडौं । नेकपा एमाले वाग्मती प्रदेशका अध्यक्ष कैलाशप्रसाद ढुङ्गेलले नेपाली जनताले फ्याँकेको राजतन्त्रको पक्षमा बहस नगर्न आग्रह गर्नुभएको छ ।
राजतन्त्रलाई नेपाली जनताले अस्वीकार गरिसकेको ढुङ्गेलले बताउनुभएको छ । ‘गणतन्त्रको विकल्प राजतन्त्र हुनै सक्दैन’, सामाजिक सञ्जाल फेसबुकमा ढुङ्गेलले लेख्नु भएको छ ।
राजतन्त्रको एकदलीय निरङ्कुश, तानासाही, दमनकारी पञ्चायती व्यवस्था नेपाली जनताले भोगेको उहाँले स्मरण गराउनुभएको छ । ‘राजतन्त्रको समयमा भएको हत्या, हिंसा, जेलनेल, राजनीतिक दल माथिको प्रतिबन्ध भोगेकै हो, राजतन्त्रकै नेतृत्वमा हिरोइन ,स्न्याक र ह्यासिसहरू भित्रिएका हुन्, पुराना मूर्तिहरू चोरिएका र बिदेसिएका हुन्’, उहाँले लेख्नु भएको छ ।
राजतन्त्रमा अशिक्षा, अभाव, गरिबी, भोकमरी र गरिबी लगायत दुष्चक्रको कहाली लाग्दो अँध्यारो युग नेपाली जनताले भोगेको उहाँले स्मरण गराउनुभएको छ । ‘सडक, खानेपानी, विद्युत्, सिँचाइ, सञ्चार जस्ता पूर्वाधारको अभावै अभाव भोगेकै हो, राजतन्त्रलाई नेपाली जनताले अस्वीकार गरी रक्षानमा फ्याँकेकै हो, तसर्थ राजतन्त्रको वकालत नगर्दा हुन्छ, इतिहास मरेको छैन नेपाली जनताले भुलेको छैन’, उहाँले लेख्नु भएको छ ।
उहाँले राजतन्त्रको पक्षमा नारा लगाउनेलाई फेरी राजतन्त्र फर्किने सपना नदेख्न आग्रह गर्नुभएको छ । ‘फेरि सत्रौँ शताब्दीतिर नफर्किए हुन्छ, राजतन्त्र फिर्ता हुने सपना नदेखे हुन्छ, गणतन्त्रको विकल्प राजतन्त्र हुनै सक्दैन’, उहाँले लेख्नु भएको छ ।
