धनुषा। नेपाल कम्युनिष्ट पार्टी (एमाले) का सचिव तथा पूर्व उपप्रधानमन्त्री रघुवीर महासेठले जनकपुरधामस्थित चक्रपथ सडकको शिलान्यास गर्नुभएको छ ।
आज जनकपुरधाम उपमहानगरपालिका–२५, लोहनामा आयोजित एक कार्यक्रमकाबीच महासेठले शिलान्यास गर्नुभएको हो । चालु आर्थिक वर्षमा उक्त सडकको सुरूवात कामका लागि भ्याटसहित रू ६ करोड ३० लाख १७ हजार ६ सय ७७ रूपैयाँमा ठेक्का सम्झौता भएर निर्माण कम्पनीद्वारा काम सुरू भएको सडक डिभिजन कार्यालय जनकपुरधामका कार्यालय प्रमुख दुर्गाप्रसादले बताउनुभयो । उहाँका अनुसार रू एक अर्ब २५ करोडको लागतमा निर्माण हुने जनकपुरधामको बाह्य चक्रपथको कूल लम्बाइ ३२ किलोमिटर हुनेछ ।
एमाले नेता महासेठले चालु आर्थिक वर्षमा थोरै बजेट भए पनि अगामी आर्थिक वर्षदेखि बहुवर्षे ठेक्काअन्तर्गत राम्रो बजेटको विनियोजन गराउने प्रतिबद्धता जनाउनुभयो ।
नेकपा एमालेका पोलिटब्यूरो सदस्य एवं धनुषा निर्वाचन क्षेत्र नं ३ का प्रतिनिधिसभाका सदस्य जुलीकुमारी महतोले जनकपुरधामको बाह्य चक्रपथको डिपिआर तयार पार्ने काम २०७६ सालमा नै भएको बताउनुभयो ।
यस वर्ष लोहना–रामपुर जोड्ने २ दशमलव २ किलोमिटर कालोपत्र र कपिलेश्वर महुवा जोड्ने १ दशमलव ५ किलोमिटरमा ग्राभेल गर्ने कार्यक्रम रहेको सडक डिभिजन कार्यालय जनकपुरधामले जनाएको छ ।
बत्तीस किलोमिटर लामो यो चक्रपथ सडकले कपिलेश्वर, महुवा, लोहना, कुवारामपुर, देवपूरा रूपैठा, बसहीया, बिन्दही, बसबिट्टी, कुर्था, लक्ष्मीनिया, ठेरा, बेङ्गा शिवपुरजस्ता क्षेत्रलाई आपसमा जोड्नेछ । स्थानीय बासिन्दाले यो चक्रपथ सडक नगरको पूर्वाधार विकासमा महत्त्वपूर्ण योगदान दिने विश्वास व्यक्त गरेका छन् ।
शिलान्यास कार्यक्रममा सङ्घीय सांसद एवं पूर्वमन्त्री जुली महतो, पूर्वमन्त्री अरविन्द साह, प्रदेशसभा सदस्य दीपेन्द्र ठाकुर, क्षीरेश्वरनाथ नगरपालिकाका नगरप्रमुख सुखदेव यादव लगायतको उपस्थिति रहेको थियो । रासस
