![](https://newspolar.com/wp-content/uploads/2022/03/Rail_4lAICnsrGc.jpg)
नयाँ दिल्ली । भारतको पश्चिम बङ्गालमा भएको रेल दुर्घटनामा कम्तीमा नौ जनाको मृत्यु भएको छ । पश्चिम बंगालको जलपाईगुडीमा बिकानेर–गुवाहाटी एक्सप्रेसका १२ वटा डिब्बा लिकबाट खसेका छन् । दुर्घटनामा ५० भन्दा बढी यात्रु घाइते भएको बताइएको छ ।
दुर्घटनाको जानकारी पाएलगत्तै रेलवे बोर्डका अध्यक्ष वीके त्रिपाठी र महानिर्देशक (सुरक्षा) घटनास्थलमा पुगेका थिए । रेल मन्त्री अश्विनी वैष्णव पनि स्थितिको जानकारी लिन जलपाईगुडी प्रस्थान गरेका छन्।
रेलवेले मृतकका आफन्तलाई पाँच लाख, गम्भीर घाइतेलाई एक लाख र सामान्य घाइते भएका यात्रुलाई २५ हजार रुपैयाँ क्षतिपूर्ति दिने घोषणा गरेको छ ।
राजस्थानको बिकानेरबाट आउँदै गरेको गुवाहाटी(बिकानेर एक्सप्रेस १५६३३ (यूपी) बिहीबार साँझ ५ः१५ बजे जलपाईगुडी जिल्लाको मयनागुरी नजिक लिकबाट खसेको थियो। यो ट्रेन पटना हुँदै असमको गुवाहाटी जाँदै थियो । मयनागुरी ट्रेनको ३४ स्टेसनको सूचीमा थिएन। रेल अधिकारीका अनुसार १२ मध्ये चार वटा कोच पूर्णरुपमा क्षतिग्रस्त भएका छन् । स्रोतका अनुसार रेलमा करिब १२०० यात्रु सवार थिए ।
प्रधानमन्त्री नरेन्द्र मोदीले रेल दुर्घटनाबारे रेलमन्त्री अश्विनी वैष्णवसँग कुरा गरेका छन्। उनले एक ट्विट गर्दै भनेका छन्, “रेलमन्त्री अश्विनी वैष्णवसँग पश्चिम बङगालमा भएको रेल दुर्घटनापछिको अवस्थाबारे जानकारी लिएँ। मेरो संवेदना पीडित परिवारहरुसँग छ। घाइतेहरुको शिघ्र स्वास्थ्य लाभको कामना गर्दछु ।” एजेन्सी