काठमाडौँ। भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा एक नेपाली विद्यार्थीको दुःखद मृत्यु भएको खबरप्रति काठमाडौंस्थित भारतीय दूतावासले गहिरो दुःख व्यक्त गरेको छ ।
दूतावासले सोमबार एक विज्ञप्ति जारी गर्दै केआईआईटीका अधिकारीहरूका साथै, ओडिशा राज्य सरकारसँग सम्पर्कमा रहेको जनाइएको छ । स्थानीय अधिकारीहरूले घटनाको अनुसन्धान सुरु गरेको दूतावासलाई जानकारी गराइएको छ ।
विश्वविद्यालयले नेपाली विद्यार्थीहरूलाई क्याम्पसमा फर्कन, आफ्नो कक्षा पुनः सुरु गर्न र छात्रावासमा बस्न अपील पनि गरेको छ । त्यस्तै, विद्यार्थीहरूलाई शैक्षिक रूपमा परेको क्षतिको जिम्मेवारी लिने आश्वासन दिएको दूतावासले जनाएकाे छ ।
विज्ञप्तिमा केआईआईटीले नेपाली विद्यार्थीहरूलाई क्याम्पसमा फर्कन, आफ्नो कक्षा पुनः सुरु गर्न र छात्रावासमा बस्न अपील गरेको र विद्यार्थीहरूलाई शैक्षिक रुपमा परेको क्षतिको पनि जिम्मेवारी लिने आश्वासन दिएको उल्लेख छ ।
भारतमा अध्ययनरत नेपाली विद्यार्थीहरू दुई देशबीचको स्थायी जनस्तर सम्बन्धका महत्त्वपूर्ण पक्ष भएको दूतावासले उल्लेख गरेको छ। विज्ञप्तिमा भारत सरकारले भारतमा नेपाली विद्यार्थीहरूको हकहित सुनिश्चित गर्न सबै आवश्यक कदम चाल्ने प्रतिबद्धता व्यक्त गरेको पनि जनाइएको छ ।
