एजेन्सी । बलिउड अभिनेता सैफ अली खानमाथि हालै घातक हमला भएको थियो । उनको शल्यक्रिया समेत गर्नुपरेको थियो ।
अभिनेता आक्रमणपछि पहिलो पटक सार्वजनिक कार्यक्रममा देखिए । सैफ आफ्नो आगामी फिल्म ‘ज्वेल थीफ’ को टिजर सार्वजनिकमा पुगेका थिए । यस क्रममा सैफले आफ्नो घाँटी र हातमा प्लास्टर लगाएका थिए ।
फिल्म ‘ज्वेल थीफ’ को टिजर एक मिनेट सात सेकेन्डको छ, जसमा सैफसँगै जयदीप अहलावत पनि देखिएका छन् । चलचित्र प्रेम, एक्सन, सस्पेन्स र षड्यन्त्रको वरिपरि घुमेको अनुमान गर्न सकिन्छ ।
यस फिल्ममा सैफ अली खानले चोरको भूमिका निर्वाह गरेका छन् । सिद्धार्थ र ममता आनन्द फिल्म ज्वेल थीफ मार्फत आफ्नो ओटीटी प्लेटफर्म नेटफ्लिक्समा डेब्यू गर्दैछन् ।
पठान र वारजस्ता ब्लकबस्टर फिल्म दिएका निर्देशक सिद्धार्थ आनन्दले यो फिल्म निर्माण गरेका हुन् । यसमा सैफ अली खानसँग जयदीप अहलावत मुख्य भूमिकामा छन् । उनीसँगै नायिका निकिता दत्त पनि छिन् । फिल्मको रिलिज मितिबारे कुनै घोषणा गरिएको छैन ।
१५ जनवरीमा सैफ अली खानमाथि घरभित्रै चक्कु प्रहार गरिएको थियो । यो घटना मुम्बईको खारस्थित गुरु शरण अपार्टमेन्टको १२ औं तल्लामा बिहान २ः४५ बजे भएको हो । यस आक्रमणमा अभिनेताको घाँटी, ढाड, हात र टाउको सहित ६ स्थानमा छुरा प्रहार गरिएको थियो ।
