नयाँदिल्लीः चीन र भारत सरकारबीच विवादित लद्दाखकाे सीमावर्ती क्षेत्रमा थप सैनिक परिचालन नगर्ने सहमति भएकाे छ ।
दुबै मुलुकका सैन्य कमान्डरबीच साेमबार भएकाे वार्तापछि यस्ताे सहमति भएकाे दुबै देशका उच्च अधिकारीहरूले बताएका छन् ।
भारत र चीनबीच लद्दाख क्षेत्रमा उत्पन्न गतिराेध अन्त्यका लागि पछिल्लाे समय रूसकाे मस्काेमा चीन र भारतका विदेश र रक्षा मन्त्रीस्तरीय बैठक बसेका थिए । ती बैठकमा सीमा क्षेत्रमा उत्पन्न विवाद सुल्झाउन मिलेर अघि बढ्ने तथा स्थानीय तहका सैनिक अधिकारीबीच थप वार्ता गर्ने सहमति भएकाे थियाे ।
लगातार झण्डै १४ घण्टा बसेकाे उच्चस्तरीय सैनिक प्रतिनिधिमण्डलबीच सीमा क्षेत्रमा थप सैनिक नपठाउन सहमति भएकाे छ । बैठकमा भारतका तर्फबाट लेफ्टीनेन्ट जनरल हरिन्दर सिंह र चीनका तर्फबाट मेजर जनरल लिउ लिनले नेतृत्व गरेकाे सैनिक टाेली सहभागी थियाे । झण्डै ५ महिनादेखिकाे तनाब कम गर्न याे बैठकमा भएकाे सहमतिले सकारात्मक नतिजा प्राप्त हुने बताइएकाे छ ।
