काठमाडौँ। खानेपानीमन्त्री प्रदीप यादवले आफू नेपाली नागरिकको सेवाका लागि सधै तम्तयार रहेको र आफ्नो उदेश्य देश विकास तथा नागरिकको हित हुने काममा खटिने बताएका छन् ।
आज पर्सा जिल्लामा आयोजित एक कार्यक्रमलाई सम्बोधन गर्दै मन्त्री यादवले देश विकास र नागरिकको सेवा गर्नु नै आफ्नो प्रमुख उदेश्य अनि लक्ष रहेको बताएका हुन् । उनले भने, “म नागरिकको सेवामा खटिएको सेवक हुँ, देशको विकास र नागरिकको सेवा गर्नु मेरो पहिलो लक्ष हो ।”
मन्त्री यादवले आफू खानेपानी मन्त्री भएपछि देशका विभिन्न दुर्गम तथा ग्रामीण क्षेत्रमा स्थलगत रूपमा खानेपानीका समस्याका विषयमा जानकारी लिएको र कतिपय ठाउँहरूमा अहिले पनि नागरिकले खानेपानी डोकोमा बोक्नुपर्ने बाध्यता रहेको पाएकाले त्यसका निकट भविष्यमै समाधान गर्ने प्रण गरेको दाबी गरे।
‘जलस्रोतको धनी देशमा पानी देऊ सरकार भन्दै नागरिकले आन्दोलन गर्नुपर्ने अनि डोकोमा पानी बोकेर खानुपर्ने अवस्था आफैमा दु:खद हो,’ उनले भने, ‘अब त्यसको अन्त्य गराउनका लागि एक घर, एक धाराको व्यवस्था गर्न म लागि परेको छु।’
