काठमाडौं । महिला यू-१९ क्रिकेट विश्वकप खेल्न मलेसिया पुगेको नेपाली टिमले दोस्रो अभ्यास खेलमा पनि हार बेहोरेको छ ।
बुधबार भएको दोस्रो अभ्यास खेलमा नेपाल अमेरिकासँग ५ विकेटले पराजित भएको हो । यसअघि नेपाल वेस्ट इन्डिजसँग ९ रनले पराजित भएको थियो ।
टस हारेर पहिला ब्याटिङ गरेको नेपालले ९ विकेटको क्षतिमा ५८ रन मात्र जोड्न सक्यो । नेपालकी ओपनर साना प्रवीनले सर्वाधिक १२ रन र कप्तान पूजा महतोले १० रन बनाए । अन्य ब्याटरहरुले दोहोरो अंकमा रन जोड्न सकेनन् ।
नेपालले दिएको लक्ष्य अमेरिकाले १४ ओभरमा ५ विकेटको क्षतिमा भेट्टाएको हो । अमेरिकाकी इसानी भगेलाले सर्वाधिक २४ रन जोडिन् ।
नेपालकी रिया शर्माले ३ विकेट र पूजा महतोले एक विकेट लिइन् ।
मलेसियामा हुने यु १९ महिला टी २० विश्वकप जनवरी १८ देखि सुरु हुनेछ । नेपालले समूह चरणमा बंगलादेश, अष्ट्रेलिया र स्कटल्यान्डसँग भिड्ने छ ।
