काठमाडौं । नेपाली क्रिकेट टीमका स्पिनर सन्दीप लामिछानेले नेपालमा अम्पायरिङको स्तरमा सुधार गर्न आवश्यक रहेको बताएका छन् ।
लामो समयदेखि नेपालको अम्पायरिङ अस्तव्यस्त रहेको र आवश्यक कदम नचालिएको भन्दै सन्दीपले यसबाट भविष्यमा खेलाडीले पीडा भोग्नुपर्नेमा सचेत गराए ।
उनले सामाजिक सञ्जालमार्फत भनेका छन्, ‘मैले यो भन्नुपर्दैन, तर नेपालमा अम्पायरिङको स्तरमा उल्लेख्य सुधार आवश्यक छ । यो लामो समयदेखि अस्तव्यस्त रहेको र आवश्यक कदम चालिएन भने भविष्यमा गलत निर्णयका कारण अनगिन्ती खेलाडीले पीडा भोग्नुपर्नेछ’ ।
हाल जारी जय ट्रफी एलिट कपमा बाग्मती प्रदेशको कप्तानी गरिरहेका लामिछानेले खेलको निष्पक्ष विकास र खेलाडीको विकासका लागि अम्पायरिङको गुणस्तर अभिवृद्धि महत्त्वपूर्ण रहेको उल्लेख गरे । उनले भनेका छन्, ‘हामीले कप्तानको रिपोर्ट रेफ्रीलाई प्रदान गर्छौं, तर पनि म कुनै परिवर्तन भएको देख्दिनँ । खेलको निष्पक्ष विकास र खेलाडीहरूको विकासका लागि अम्पायरिङको गुणस्तर अभिवृद्धि महत्त्वपूर्ण छ । आशा छ, सम्बन्धित निकायले ध्यान दिनु हुनेछ र आवश्यक सुधारको लागि पहल गर्नेछ’।
