काठमाडौँ । न्यूजिल्याण्डका आक्रामक ब्याट्सम्यान मार्टिन गप्टिलले अन्तर्राष्ट्रिय क्रिकेटबाट सन्यासको घोषणा गरेका छन् ।
उनी हाल न्यूजिल्याण्डको घरेलु टी–२० लिगमा अकल्याण्डबाट खेलिरहेका छन् । ३८ वर्षीय गप्टिलले न्यूजिल्याण्डका लागि अन्तिमपटक सन् २०२२ को अक्टोबरमा खेलेका थिए । यद्यपि,उनले व्यावसायिक लिग भने खेल्ने छन् ।
‘लामो समय अन्तर्राष्ट्रिय क्रिकेटमा आफ्नो देशको प्रतिनिधित्व गर्न पाउनु मेरा लागि गर्वको विषय हो । तर, अब समय आएको छ । मैले पनि अन्तर्राष्ट्रिय क्रिकेटबाट बिदा लिने निर्णय गरेको छु,’ सन्यास घोषणा गर्दै गप्टिलले भनेका छन् ।
उनले न्यूजिल्याण्डका लागि तीनवटै ढाँचाको अन्तर्राष्ट्रिय प्रतियोगिता खेलेका छन् । गप्टिलले अन्तर्राष्ट्रिय क्रिकेटमा १३ हजारभन्दा बढी रन बनाएका छन् ।
उनले तीनवटै ढाँचाको अन्तर्राष्ट्रिय क्रिकेटमा कुल १२ विकेट पनि लिएका छन् । गप्टिल टी–२० अन्तर्राष्ट्रिय क्रिकेटमा न्यूजिल्याण्डका लागि सबैभन्दा बढी रन बनाउने ब्याटर समेत हुन् ।
उनले यस प्रारूपमा १२२ टी-२० आईमा ३ हजार ५३१ रन बनाएका छन् । गप्टिलले हालै सम्पन्न नेपाल प्रिमियर लिग (एनपिएल)पनि खेलेका थिए । विराटनगर किंग्सबाट लिग खेलेका उनले एनपिएलमा ६ खेलमा १३७ रन बनाएका थिए ।
