सदस्यता नै खोसिएपछि विकल्प खोज्न बाध्य भएँः भीम रावल – पूर्णपाठ

काठमाडौँ । नेकपा एमालेबाट निष्कासित नेता भीम रावलले सदस्यता नै खोसिएपछि विकल्प खोज्न बाध्य भएको बताएका छन् ।

बुधबार काठमाडौंमा पत्रकार सम्मेलन आयोजना गर्दै उनले यस्तो बताएका हुन् । एमालेमा आफूले गरेको संघर्ष र विभिन्न कमिटीमा रहेर गरेका कामहरूको बारेमा संक्षेपमा स्मरण गर्दै उनले भने ‘सदस्यता नै खोसिएपछि विकल्प खोज्न बाध्य भएँ । ममाथि पूर्वाग्रह राखेर कारबाही गरियो ।’

आफूलाई चितवनमा सम्पन्न महाधिवेशनमा अध्यक्षमा केपी शर्मा ओलीसँग प्रतिस्पर्धा गरेको भन्दै कारबाही गरिएको जिकिर गर्दै रावलले ओलीले पनि किन झलनाथ खनाल र माधव नेपालसँग अध्यक्षमा प्रतिस्पर्धा गरेको भन्दै प्रश्न गरे ।

यस्तै, मुलुकको कूटनीति कमजोर बनेको उल्लेख गर्दै नेता रावलले जमिन बाँझो भएको तथा युवा विदेशिएको कुरा उठाउँदै ठूला भ्रष्टाचारको मुद्दाबारे पनि पत्रकार सम्मेलनमा बोले ।

अपराधलाई राजनीतिकरण र राजनीतिलाई आपराधिकरण गरिएको उनको भनाई छ । मुलुकमा लम्पसारवाद बढेको भन्दै रावलले यसलाई देशभक्त नागरिकले हेरेर बस्न नहुने बताए ।

रावलले आफू पार्टी निर्माणमा निरन्तर सक्रिय हुँदै आएको दावी गर्दै तर पछिल्लो समय दुरासय राखेर आफूमाथि पूर्वाग्रहपूर्ण व्यवहार गरिएको टिप्पणी गरे । पत्रकार सम्मेलनका क्रममा रावलले पटक–पटक एमाले अध्यक्ष केपी शर्मा ओलीको आलोचना गरेका छन् ।