काठमाडौं । पोखरास्थित अन्तर्राष्ट्रिय विमानस्थलमा आज एउटा चिनियाँ विमानले अवतरण गर्ने भएको छ । सिचुआन एअरलाइन्सको विमान आज पोखरा आउन लागेको हो । सो विमान बिहान पौने १० बजे अवतरण गर्ने कार्यक्रम छ ।
आइतबारदेखि हुन लागेको अन्तर्राष्ट्रिय ड्रयागन डुंगा दौड प्रतियोगिता २०२४ मा सहभागी हुने प्रतियोगीहरुलगायत सरकारी तथा गैरसरकारी अधिकारीहरु, सञ्चारकर्मीलाई लिएर विमान आउन लागेको हो । आयोजक संस्थाका तर्फबाट पर्सि साँझ पोखरा इभेन्ट सेन्टरमा सहभागीहरुको सम्मानमा रात्रिभोज आयोजना गरिँदै छ ।
आइतबार बिहान ९ बजे लेक साइडमा अन्तर्राष्ट्रिय डुंगा दौड प्रतियोगिता २०२४ को औपचारिक शुभारम्भ हुुने कार्यक्रम छ । प्रतियोगिताअन्तर्गत बिहान पौने १० बजे २०० मीटर र ११ बजे पाँच सय मीटर सोझो डुंगा दौड हुनेछ ।
सोमबार बिहान साढे ९ बजेबाट २०० मीटरको सेमिफाइनल र १० बजे फाइनल दौड हुने छ । साढे १० बजे पाँच सय मिटरको सेमिफाइनल, सवा ११ बजे पाँच सय मिटरको फाइनल र पौने १२ बजे पुरस्कार तथा समापन समारोहको आयोजना गरिने आयोजकले जनाएको छ ।
