काठमाडौँ : नेपाल आयल निगमले पेट्रोलियम पदार्थ बिक्री वितरण गर्नका लागि १० जिल्लामा नयाँ साधारण बिक्रेता नियुक्त गर्न आवेदन आह्वान गरेको छ। निगमको मिति मंसिर १० गतेको निर्णयअनुसार हालसम्म कुनै साधारण बिक्रेताबाट पेट्रोलियम पदार्थ बिक्री वितरण हुन नसकेका जिल्लाहरूमा नयाँ बिक्रेता छनोट गरिनेछ।
जाजरकोट, बझाङ, बाजुरा, हुम्ला, मुगु, डोल्पा, कालिकोट, मुस्ताङ, मनाङ, र रुकुम पूर्व समेतका १० जिल्ला तथा पुष्पलाल (मध्यपहाडी) राजमार्गमा पेट्रोलियम पदार्थको खुद्रा बिक्रीबितरण गर्ने नयाँ साधारण बिक्रेता नियुक्तिका लागि आवेदन दिन इच्छुक फर्म, कम्पनी, संस्थाहरूलाई यो सूचना जारी गरिएको हो।
पेट्रोलियम पदार्थ बिक्रेता विनियमावली २०७५ (तेस्रो संशोधनसहित) को अनुसार आवेदन दिन सकिनेछ। इच्छुकहरूले नेपाल आयल निगमको केन्द्रीय कार्यालय वा क्षेत्रीय कार्यालयहरूबाट आवेदन विवरण प्राप्त गर्न सक्नेछन्। आवेदन फाराम बुझाउन मिति प्रकाशित भएको ६० दिनभित्र आवेदन पेश गर्न भनिएको छ।
थप जानकारीका लागि इच्छुक आवेदकहरूले नेपाल आयल निगमको आधिकारिक वेबसाइट www.noc.org.np हेर्न सक्ने निगमले जनाएको छ ।
