एजेन्सी । नेपालका अलराउन्डर कुशल मल्लले संयुक्त अरब इमिरेट्स (यूएई)को इन्टरनेशनल लिग टी–२० क्रिकेट खेल्ने भएका छन् ।
मल्ल इन्टरनेशनल लिग टी–२० क्रिकेटका लागि डेजर्ट भाइपर्समा अनुबन्ध भएका हुन् । चोटका कारण प्रतियोगिताबाट बाहिरिएका नेदरल्यान्ड्सका अलराउन्डर बास डी लीडेको स्थानमा मल्लले खेल्नेछन् ।
मल्लले भर्खरै सकिएको पहिलो संस्करणको नेपाल प्रिमियर लिग (एनपीएल) क्रिकेटमा ८ खेलमा २ सय २७ रन बनाउनुका साथै ९ विकेट लिएका थिए ।
मल्ल टी–२० अन्तर्राष्ट्रिय क्रिकेटमा नेपालका लागि सबैभन्दा धेरै रन बनाउने खेलाडीको पाँचौं स्थानमा छन् । उनले ४७ खेलमा एक शतक, चार अर्धशतकसहित १ सय ४७ भन्दा धेरैको स्ट्राइक रेटमा ९ सय १७ रन बनाएका छन् ।
डेजर्ट भाइपर्स क्रिकेटका निर्देशक टम मुडीले कुशल मल्ललाई टोलीमा स्वागत गर्न पाउँदा खुशी भएको उल्लेख गरेका छन् । कुशल आबद्ध भएको डेजर्ट भाइपर्सले पहिलो खेल आउँदो जनवरी १२ मा अबुधाबी नाइट राइडर्ससँग खेल्नेछ ।
