काठमाडौँ । मलेसियामा जारी एसिसी यु– १९ महिला एसिया कप क्रिकेटअन्तर्गत सुपर चारको आफ्नो दोस्रो खेलमा नेपालले बंगलादेशसँग प्रतिस्पर्धा गरिरहेको छ । नेपालले बंगलादेशलाई ५५ रनको लक्ष्य दिएको छ ।
मलेसियाको बायोमास ओभल क्रिकेट मैदानमा टस हारेर पहिले ब्याटिङ थालेको नेपालले निर्धारित ११ ओभरमा ८ विकेटको क्षतिमा ५४ रन जोड्यो ।
नेपालका लागि साबित्री धामीले एघार, पूजा महतोले नौ, एलिशा कुमारी यादवले आठ, ज्योत्स्निका मरासिनीले पाँच, तिर्सना विश्वकर्माले चार, सिमाना केसी र कुसुम गोदारले तीन–तीन रन बनाए ।
बलिङतर्फ बंगलादेशका फर्जाना इस्मिन, फहोमिदा चोया, हबिबा इस्लाम र अनिसा अक्तर सोवाले एक–एक विकेट लिए । नेपालका तीन खेलाडी रनआउट भए ।
वर्षा बाधक भएपछि खेललाई ११ ओभरमा झारिएको छ । यस खेलमा बङ्गलादेशलाई हराएमा नेपाल फाइनलमा पुग्नेछ । नेपाल समूह ‘बी’ को उपविजेता तथा बङ्गलादेश समूह ‘ए’ को विजेताका रूपमा सुपर फोरमा पुगेका हुन् ।
सुपर फोरको पहिलो खेल वर्षाका कारण रद्द हुँदा नेपालले श्रीलङ्कासँग अङ्क बाँडेको थियो ।
