गुल्मी : गुल्मीको कालिगण्डकी गाउँपालिकाका अध्यक्ष वेद बहादुर थापा मगर पक्राउ परेका छन् । बिहीबार दिउँसो जिल्ला प्रशासन कार्यालय गुल्मीको राहदानी शाखाको स्क्यानर फुटाएको आरोपमा उनी पक्राउ परेका हुन् ।
थापाले स्क्यानर फुटाएपछि शुक्रबारको राहदानी सेवा समेत अवरुद्ध हुन सक्ने प्रमुख जिल्ला अधिकारी जनार्दन गौतमले बताए ।
स्क्यानरको मुल्यबारे भने प्रशासनले केही बताएको छैन । ‘स्क्यानरको मुल्यभन्दा पनि सेवा नै प्रभावित हुने भयो ।’ प्रजिअ गौतमले भने, ‘पालिका अध्यक्ष अभद्र व्यवहारमा प्रस्तुत हुनुभयो ।’
आजभोलि प्रशासनमा पहिला आउने व्यक्तिले टोकन लिने र उसैले पहिले सेवा लिने भन्ने प्रावधान रहेको छ । तर अध्यक्ष थापा मगरले कालिगण्डकी भुगोलका दृष्टिले टाढा रहेकाले आफ्नो पालिकाका नागरिकलाई विशेष व्यवस्था गर्न माग गरेको तर त्यसो नभएकाले स्क्यानर फुटाएको दाबी गरे ।
‘आफ्नो पालिकाका नागरिकको न्यायका लागि जहाँ पनि जान तयार छु ।’ थापाले भने । प्रजिअ गौतमले घटनाको बिषयमा गृह मन्त्रालयलाई जानकारी गराएको र थप छलफल भइरहेको जानकारी दिए ।
