काठमाडौं । नेपाल प्रिमियर लिगअन्तर्गत बुधबारको पहिलो खेलमा सुदूरपश्चिम रोयल्सविरुद्ध जनकपुर बोल्ट्सले लज्जास्पद हार बेहोरेको छ । चार खेल लगातार जितेको जनकपुर पाचौँ खेलमा सुदूरपश्चिमसँग ७२ रनले पराजित भएको हो ।
सुदूरपश्चिमले दिएको १२४ रनको लक्ष्य पछ्याएको जनकपुर १२ ओभरमा सबै विकेट गुमाएर जम्मा ५१ रन बनायो । यो एनपिएलमा बनेको सबैभन्दा कम स्कोर हो । यसअघि पोखरा एभेन्जर्स चितवन राइनोजविरुद्ध ७४ रनमा अल आउट भएको थियो ।
जनकपुरले पावरप्लेमा नै ५ विकेट गुमाएको थियो । जनकपुरका ओपनरद्वय अनिलकुमार शाह र आसिफ शेखसहित टप अर्डर ब्याटर लाहिरु मिलान्था, हर्ष थाकर र शुभ कंशाकार पावरप्ले मै आउट भएका थिए । अनिल शून्य, आसिफ ४, लाहिरु ७, हर्ष ५ र शुभ शून्य रनमा आउट भए । जनकपुरका जोसुवा ट्रम्पबाहेक कसैले नि दोहोरो अंकमा रन बनाउन सकेनन् । उनले १३ रन बनाए ।
बलिङ सुदूरपश्चिमका इशान पाण्डे, कप्तान दीपेन्द्रसिंह ऐरी र हर्मित सिंहले समान दुई विकेट लिए । सैफ अली जैवले एक विकेट लिएका छन् ।
त्यसअघि कीर्तिपुरस्थित त्रिभुवन विश्वविद्यालय मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा नौ विकेट गुमाएर एक सय २३ रन बनाएको थियो ।
सुदूरपश्चिमका लागि ओपनर विनोद भण्डारीले सर्वाधिक ३३ रन बनाए । यसैगरी, सैब जैबले २१, इशान पाण्डेले १७, ब्रान्डन म्याकमुलेनले ११ रन बनाए । त्यसबाहेक अन्य खेलाडीले दोहोरो अङ्कमा रन जोड्न सकेनन् ।
जनकपुरका लागि किशोर महतो एक्लैले चार विकेट लिए । त्यस्तै शेर मल्ल र अरनिको यादवले समान दुई–दुई विकेट झारेभने हर्ष ठाकरले एक विकेट लिए ।
योसँगै, पाँचौ खेलमा पहिलो हार बेहोरेको जनकपुर शीर्ष स्थानबाट दोस्रो स्थानमा झरेको छ भने पाँचौ खेलमा चौथो जित हात पार्दै सुदूरपश्चिम शीर्ष स्थानमा उक्लिएको छ ।
