काठमाडौँ । विभिन्न टिप्पणी र तर्कका कारण समय समयमा सामाजिक सञ्जाल तथा मिडियामा चर्चामा आइरहने पूर्व प्रधानमन्त्री डा.बाबुराम भट्टराइ दुई दिन अघिको टिप्पणी अकस्मात चर्चामा आयो । नआओस पनि कसरी ? उनले सानो तिनो विषय नभएर बडो गम्भीर खुलासाका साथ उपस्थित भएका थिए । उनले स्पष्टै यो भने कि नेपालका वर्तमान प्रधानमन्त्री केपी ओली र अरु दुई पूर्व प्रधानमन्त्रीहरुले मिलेर ९ अर्ब भ्रष्टाचार गरेको संगीन आरोप लगाएका थिए । यसलाई आरोप नै भन्न नमिल्नेगरी यसको खुलासा गरे । उनले आत्मविश्वासका साथ आफूसँग यसको प्रमाण समेत भएको टिप्पणी गरे । त्यसैले यसलाई मिडियाले आरोप नै भन्न नमिल्ने अवस्था उनको तर्कले ल्याइदिएको छ ।
शुक्रबार राजधानीमा आयोजित एक सार्वजनिक कार्यक्रममा उनले यो कुराको खुलासा गरेका थिए । उनले बुढीगण्डकी जलविद्युत आयोजनामा प्रधानमन्त्री ओली र अरु दुई जना पूर्व प्रधानमन्त्रीहरु शेरबहादुर देउवा र माधवकुमार नेपालले त्यस आयोजनामा भ्रष्टाचार गरेर रकम कुम्ल्याएको बताए । यो उनको सडकमा बिकाउ भाषणका लागि दिएको अभिव्यक्तिजस्तो पनि देखिँदैनथ्यो किनभने सुन्नेमा एकाध कार्यकर्तामात्र कार्यक्रमस्थलमा थिए । उनले यो मात्र भनेनन् र यदि कसैले अनुसन्धान गर्छ भने त्यसको प्रमाण नै आफूसँग रहेको दलिल नै पेस गरे । यसबाट के देखिन्थ्यो भने उनले रकम र भ्रष्टाचार गरेको घटना र विषयलाई नै उजागर गरिदिएका थिए ।
यसले देशका नीति निर्माता, भ्रष्टाचारको नियन्त्रणमा कामगर्ने निकाय तथा पदाधिकारीको ध्यान यथेष्ट मात्रामा पुग्नुपर्ने हो । किनभने यो टिप्पणी सडकमा दिन काट्नका लागि भाषण गरी हिँड्ने कुनै सर्वसाधारण व्यक्तिले गरेको होइन, मुलुकको प्रधानमन्त्री भइसकेका व्यक्तिले भनिरहेका छन् । उनले कुरा नबुझेर यस्तो दोषारोपण गरेका हुन् भन्न पटक्कै मिल्दैन किनभने उनले सोही भाषणमा आफूलाई र आफ्नी पत्नी तथा पूर्व मन्त्री हिसिला यमिलाई उच्च कोटिको अध्ययन गरेको र अरु नेताहरुले भने आठ या दश कक्षा मात्र पास गरेका त्यो पनि चिट चोरेर भनेका छन् । त्यस्ता व्यक्तिहरुले आफूहरुलाई भ्रष्टाचार गरेको भन्न नसुहाउने उनको तर्क थियो ।
यहाँको अर्काे बडो रमाइलो पक्ष के छ भने यस विषयमा आरोपित तीन जना व्यक्तिको कुनै प्रतिक्रिया आएको छैन । उनीहरुले यस विषयमा कुनै प्रतिक्रिया नजनाउँदा के मौनं सम्मति लक्षणं भन्न मिल्ने हो र ? या यो कुनै प्रतिक्रिया दिन लायक विषय पो उहाँहरुले ठानेको हो कि ? अनि आपूmले प्रमाण दिने भनेर पूर्व प्रधानमन्त्रीजस्तो व्यक्तिले भनिरहँदा भ्रष्टाचारको प्रमाण खोजिहिँड्ने अख्तियार र यस्तै नेपाल सरकारका अरु निकायहरुले उहाँलाई बोलाएर एउटा बयान गराउन सकिन्छ कि सकिँदैन ? आखिर त्यो पनि छैन । यदि सही हो भने उहाँलाई प्रमाणको रुपमा लिएर प्रक्रिया अघि बढाउनुपर्यो र यदि होइन भने उहाँकै बारेमा अनुसन्धान गर्नुपर्यो । बाबुराम बाहेक सबै मौन किन ? यसको जवाफ कसले दिने ? जुन कोणबाट गरे पनि यस विषयका प्रश्न गम्भीर छन् ।
