काठमाडौँ । इंग्लिस प्रिमियर लिग फुटबल अन्तर्गत आर्सनलले बराबरी खेलेको छ । गएराति भएको खेलमा आर्सनलले फुलहमसँग १–१ गोलको बराबरी खेल्दै अंक बाँडेको हो ।
खेलको ११ औं मिनेटमा राउल जिमिनेजले गोल गर्दै घरेलु टोलि फुलहमलाई सुरुवाती अग्रता दिलाएका थिए । ५२ औं मिनेटमा विलियम सलिबाले गोल गर्दै आर्सनललाई १–१ को बराबरीमा ल्याए ।
खेलको अन्त्यतिर ९० औं मिनेटमा बुकायो साकाले गोल गरेपनि भिएआरले उनको गोललाई मान्यता दिएन । गाब्रियल मार्टिनेली जसले साकालाई पास उपलब्ध गराएका थिए उनी अफसाइड पोजिसनमा रहेपछि गोल रद्ध भएको थियो ।
बराबरीसँगै आर्सनल १५ खेलबाट २९ अंकका साथ तालिकाको तेस्रो स्थानमा छ । फुलहम २३ अंकका साथ १० औं स्थानमा छ ।
यस्तै, गएराति नै भएको अर्को खेलमा लेस्टर सिटी र ब्राइटनले पनि बराबरी खेलेका छन् । दुई गोलले पछि परेको अवस्थामा लेस्टर सिटीले पुनरागमन गर्दै बराबरी गरेको हो ।
खेलको ३७ औं मिनेटमा तारिक लाम्पटेले गोल गर्दै ब्राइटनलाई सुरुवाती अग्रता दिलाएका थिए । ७९ औं मिनेटमा यान्कुवा मिन्तेहले गोल थप्दै ब्राइटनको अग्रता दोब्बर पारे ।
यता, ८६ औं मिनेटमा जेमी भर्डी र ९०+१ औं मिनेटमा बबी डि कोर्डोभा रिडले गोल गर्दै लेस्टरलाई २–२ को बराबरीसहित हारबाट जोगाए ।
यो नतिजापछि ब्राइटन १५ खेलबाट २४ अंकका साथ तालिकाको सातौं स्थानमा छ भने लेस्टर १४ अंकका साथ १६ औं स्थानमा छ ।
