काठमाडौँ । इंग्लिस प्रिमियर लिग अन्तर्गत ब्रेन्टफोर्डले सहज जित निकालेको छ । गएराति भएको खेलमा ब्रेन्टफोर्डले लेस्टर सिटीलाई ४–१ गोलले हराएको हो ।
ब्रेन्टफोर्डलाई जित दिलाउन केभिन स्चेडले ह्याट्रिक गरे भने योआन वीसाले एक गोल गरे । लेस्टरका फाकुन्डो बोउनानोटेले एक गोल फर्काए ।
खेलको २१ औं मिनेटमा फाकुन्डोले गोल गर्दै लेस्टरलाई सुरुवाती अग्रता दिलाएका थिए । २५ औं मिनेटमा वीसाले गोल गर्दै ब्रेन्टफोर्डलाई १–१ गोलको बराबरीमा ल्याए ।
त्यसपछि २९, ४५+८ र ५९ औं मिनेटमा केभिनले ह्याट्रिक गर्दै ब्रेन्टफोर्डलाई ४–१ को जित दिलाए । जितसँगै १३ खेलबाट २० अंक जोडेको ब्रेन्टफोर्ड अंकतालिकाको सातौं स्थानमा छ । लेस्टर १० अंकसहित १६ औं स्थानमा छ ।
यस्तै, गएराति नै भएको अर्को खेलमा न्युक्यासल युनाइटेड र क्रिस्टल प्यालेसले १–१ गोलको बराबरी खेल्दै अंक बाँडेका छन् ।
न्युक्यासलले एक गोल पनि उपहारस्वरुप पाएको थियो । ५३ औं मिनेटमा प्यालेसका मार्क गुइहीले आत्मघाती गोल गरेका थिए । खेल सकिनै लाग्दा इन्जुरी समयमा डानियल मुनोजले गोल गर्दै प्यालेसको हार टारे ।
न्युक्यासल १३ खेलबाट १९ अंकसहित १० औं स्थानमा छ भने प्यालेस ९ अंकसहित १७ औं स्थानमा छ ।
