काठमाडौं । राष्ट्रिय प्रजातन्त्र पार्टीको युवा संगठनका अध्यक्ष सुजित केसीले काठमाडौंको मूलपानी क्रिकेट मैदान निर्माणका क्रममा ठूलो अनियमिता र भ्रष्टाचार भएको आरोप लगाएका छन् ।
केसीले खेलाडीहरु विदेशमा देशको झन्डा फहराएर देशको इन्जत राख्ने तर भ्रष्ट दलालहरु मूलपानी अन्तर्राष्ट्रिय क्रिकेट रंगशाला निर्माणका क्रममा अनियमितता र भ्रष्टाचार गर्ने ? भन्दै प्रश्न गरेका हुन् ।
उनले सामाजिक सञ्जालमार्फत् अनियमितताका विषयमा युवाहरुले विरोध र ध्यानकर्षण गराउँदा दबाब दिने, प्रलोभनमा पार्न खोज्ने भ्रष्टाचारी दलालहरुलाई नछाड्ने चेतावनीसमेत दिएका छन् ।
केसीले सामाजिक सञ्जालमा मूलपानी मैदानका केही फोटोसमेत पोस्ट गरेर लेखेका छन्–
खेलाडीहरु विदेशमा देशको झण्डा फराएर देशको ईज्जत राख्ने तर भ्रष्ट दलालहरु मुलपानी अन्तर्राष्ट्रिय क्रिकेट रंगशाला निर्माणको क्रममा अनियमितता र भ्रष्टाचार गर्ने ?
मुलपानी अन्तर्राष्ट्रिय क्रिकेट रंगशालामा भएका अनियमितता यसप्रकारका छन ।
– मुलपानी अन्तर्राष्ट्रिय क्रिकेट रंगशालाको लागि खेलाडीहरूको होस्टेल निर्माणका लागि काठमाडौँ महानगरपालिकाले दिएको १ करोड रुपैयाँ अनुदान दुरुपयोग गरेको ।
– MCC प्रतियोजनाको ठेकेदार कम्पनीलाई रंगशालाको जग्गा खेलकुद परिषदको मास्टर प्लान र कानुन विपरित भाडामा दिएको ।
– निर्माण गरिएको संरचना अलपत्र रहेको, निर्माण भइसकेको भनिएको भवनसमेत ध्वस्त अवस्थामा रहेको ।
– रंगशालाको सम्पूर्ण जग्गा सीमाङ्कन विवाद यथावत रहेको…।
– सरकारी स्रोत र बजेटको दुरुपयोग गरेको र जसले गर्दा रंगशालाको विकासमा गम्भीर बाधा पुर्याएको लगायतमा प्रत्यक्ष र परोक्ष रुपमा संलग्न रहेकाहरु विरुद्ध अब हामी सबै युवाहरु एकबद्ध भएर लाग्नुपर्ने दिन आएको छ
मुलपानी अन्तर्राष्ट्रिय क्रिकेट रंगशालामा भएको अनियमितताका विषयमा युवाहरुले विरोध र ध्यानकर्षण गराउदा दबाब दिने, प्रलोभनमा पार्न खोज्ने भ्रष्टाचारी दलालहरु होसियार…।
खबरदार ! भ्रष्टाचारीहरुलाई हामी छोड्ने छैनौं ।
