विराटनगर । भारतस्थित बिहारका लोकप्रिय भोजपुरी कलाकार खेसरीलालले तेस्रो बर्जु महोत्सवमा भएको आगजनी तथा तोडफोडको दोष आयोजक पक्षलाई दिएका छन् । उनले टिकट सो हो भन्ने आफूलाई थाहै नदिई गुमराहमा राखेको बताएका छन् । आगजनीमा आफ्नो सवारी साधनमा क्षति पुगेको भन्दै उनले सोबापतको क्षतिपूर्ति माग गरेका छन् । साथै प्रशासनले महोत्सव आयोजना गर्न दिएको अनुमति रद्द भएको आफूलाई आयोजकले जानकारी समेत नदिएको बताएका छन् । उनलाई कार्यक्रमका लागि आउँदै गर्दा प्रशासनले विराटनगरमै रोकेको थियो ।
विराटनगरमा पत्रकारहरुसँग उनले आयोजनास्थलमा भएको आगजनी र तोडफोडबाट आफ्नो डेढ करोडको क्षति भएको भन्दै त्यसको क्षतिपूर्ति पाउनुपर्ने बताए । घटनामा स्थानीय जनता तथा प्रशासनको कुनै दोष नभई सम्पूर्ण दोष आयोजक भएको उनको भनाइ थियो । टिकट विक्री गरेर पनि कलाकार खेसरीलाललाई नबोलाएको भन्दै आक्रोशित भिडले आयोजना स्थल तोडफोड गर्दै चारवटा स्कारपियोमा आगजनी गरेको थियो ।
बर्जु तालमा गत पुस २३ गतेदेखि बर्जु महोत्सव सुरु भएको थियो । कोरोना सङ्क्रमण बढेसँगै स्थानीय प्रशासनले पुस २७ गते नै महोत्सव रोक्न निर्देशन दिएको थियो । तर आयोजकले प्रशासनको निर्देशनलाई बेवास्ता गरेपछि प्रशासनले पुनः माघ २ गते महोत्सव रोक्न लिखित आदेश नै दिएको थियो । त्यसपछि पनि आयोजकले मङ्गलबार खेसरीलाललाई बोलाएको थियो । खेसरीलाल आउँदै गर्दा स्थानीय प्रशासनले महोत्सव रोक्न निर्देशन दिएकाले कार्यक्रमको कुनै अनुमति नभएको र सुरक्षा पनि दिन नसकिने बताएपछि उनलाई बीच बाटैमा रोकेर विराटनगर स्थित होटलमा राखिएको थियो ।
प्रहरीका अनुसार मङ्गलबार मध्याह्न १२ बजेसम्म उनी महोत्सवस्थलमा नपुगेपछि आक्रोशित भीडले भारतीय नम्बर प्लेटका चारवटा स्कोरपियो गाडीमा आगजनी गर्नुका साथै स्टेज, साउन्ड सिस्टम र लाइटहरु तोडफोड गरेको थियो । खेसरीलालले कोरोना सङ्क्रमणका कारण प्रशासनले कार्यक्रममाथि रोक लगाएको बारेमा आफूलाई कुनै जानकारी नभएको र आयोजकले समेत कुनै जानकारी नदिएको बताए । आयोजकले कार्यक्रमका लागि ३०० र ५०० का अग्रिम टिकट विक्री गरेको बताइएको छ ।
