असहज परिस्थितिमा पनि हिउँले ढाकेको बाटो हुँदै बागलुङ रणसिंहकिटेनी स्वास्थ्यचौकीकी अनमी प्रेमकुमारी केसीले खोप सामग्री बोकेर लैजाँदै गरेको फोटो सार्वजनिक भएको छ । गण्डकी प्रदेश स्वास्थ्य निर्देशनालयले आफ्नो फेसबुक पेजमा यसको पुष्टि गर्दै दुईवटा तस्बिर पोस्ट गरेको छ ।
तस्बिरमा केसीले खोप सामग्री बोकेर हिउँको बाटो छिचोल्दै गरेको देखिन्छ । निर्देशनालयले भनेको छ, “कर्तव्यनिष्ठ स्वास्थ्यकर्मीहरुप्रति हार्दिक सम्मान व्यक्त गर्दछौँ।” निर्देशनालयको सो तस्बिरमा ‘फेसबुकको भित्ताको सम्मानले पुग्दैन होला तेस्ता कर्मचारीलाई राज्यले विशेष सेवा सुविधा दिन पर्ने जस्तो लाग्यो’ भनेर कमेन्ट गरिएको छ ।
करिब एक वर्षअघि पनि मनाङमा पुल नहुँदा कठिन परिस्थितिमा खोप सामग्री लिएर दुई युवा खोलो तरिरहेको फोटो सार्वजनिक भएको थियो । सो फोटोलाई विश्व स्वास्थ्य सङ्गठनले समेत सार्वजनिक गर्दै प्रशंसा गरेको थियो ।
नेपालमा अहिले कोरोनाको तेस्रो लहर सुरु भइसकेको छ । दैनिक हजारौँ कोरोना सङ्क्रमित थपिइरहेका छन् । कोरोना महामारीको नियन्त्रण तथा उपचारका लागि अहिले यसविरुद्धको खोपलाई नै प्रभावकारी मानिएको छ ।
