काठमाडौँ । आईसीसी यू–१९ महिला विश्वकप क्रिकेटअन्तर्गत एसियाली क्षेत्रको छनोट प्रतियोगितामा नेपाली ब्याटर पूजा महतोले शतक बनाएकी छन् ।
युएईको अजमानस्थित द सेभेन स्टेडियममा जारी खेलमा पूजाले कुवेतविरुद्ध शानदार शतक बनाएकी हुन् ।
यू–१९ क्रिकेटमा पुजाको यो पहिलो शतक हो । उनले ५७ बलमा १२ चौकासहित शतक पूरा गरेकी हुन् ।
आफ्नो पाँचौं खेलमा टस जितेर ब्याटिङ रोजेको नेपालले यो समाचार तयार पार्दासम्म १६.२ ओभरमा २ विकेट गुमाएर १ सय ६६ रन बनाएको छ ।
प्रतियोगितामा नेपालले ४ खेलमा ३ जित र एक हार बेहोर्दै अङ्कतालिकामा ४ खेलमा ६ अङ्कसहित दोस्रो स्थानमा रहेको छ ।
नेपालले यसअघि कुवेतलाई १०८ रनले पराजित गरेको थियो । त्यस्तै, कुवेतले अहिलेसम्मका चारै खेलमा हार बेहोरेको छ ।
