काठमाडौं । सूर्यको उपासनाको पर्व छठ आजदेखि सुरु भएको छ । चार दिनसम्म मनाइने छठको मुख्य दिन बिहीबार परेको छ ।
बिहीबार अस्ताउँदो सूर्यलाई अर्घ दिने र शुक्रबार बिहान उदाउँदो सूर्यलाई अर्घ दिएपछि छठ समापन हुन्छ ।
छठ मनाउन तराई मधेशका जिल्लामा मात्र होइन, काठमाडौं उपत्यकाका नदी, ताल, तलैया सिँगारेर झकिझकाउ पारिएको छ ।
छठ पर्व मनाउनका लागि झिलिमिली बत्तीसहितको झलरले नदी तथा तलाउ सिंगारिएको हो । पोखरीको सजावट हेर्न विदेशी पर्यटकको पनि घुइँचो लाग्ने गर्छ ।
छठका लागि बजारमा सामान किनमेल गर्नेहरूकाे समेत भीड छ ।
महोत्तरीको जलेश्वर नगरपालिका–१ स्थित हटियामा छठ पूजाका लागि कलश, ढकनी, सरबीलगायत माटाकोका सामग्री किन्दै व्रतालु । छठ पर्वमा कुरबार, ढकनी, सरबी लगायतमा अर्घ (प्रसाद) चढाइन्छ । तस्बिरः सञ्जीतकुमार मण्डल /रासस
धनुषाको जनकपुरधामस्थित गंगासागर पोखरीमा लोकआस्थाको महापर्व छठका लागि जलाशयको सरसफाइ र पूजाका लागि घाट निर्माण कार्य अन्तिम चरणमा । दीपावली सकिए लगत्तै छठ पर्व सुरु हुने हुँदा मधेसमा घाट निर्माणलगायतका तयारीमा जुट्ने गर्छन् । तस्बिरः अजयकुमार साह / रासस
वीरगञ्जको घण्टाघर चोकस्थित बजारमा मङ्गलबार छठ पूजाका लागि पूजा समाग्री खरिद गर्दै । पूजाका लागि केही दिन अघिबाटै माटो तथा बाँसका सामग्री खरिद गर्नेको भीडभाड बढेको छ । तस्बिरः विजय कुमार महतो/रासस
सप्तरीको राजविराज–३ मा रहेका कल्टु पोखरीमा छठ पर्वका लागि तयारी गरिएको छठ घाट । तस्बिरः अरुण यादव/रासस
छठको तयारीका लागि सजाइएको सुनसरी जिल्लास्थित बुढी (गङ्गा जमूना) खोला आसपासको क्षेत्र । तस्बिर : गोपाल दाहाल / रासस
छठ पर्व मनाउनका लागि झिलिमिली बत्तीसहितको झलरले सिङ्गारिएको वीरगञ्जस्थित घडीअर्वा पोखरी । छठ पर्वका लागि निर्माण गरिएको पण्डाल तथा पोखरीको सजावट हेर्न विदेशी पर्यटकको पनि घुइँचो लाग्ने गर्छ । तस्बिरः हिमाल लम्साल/रासस
सप्तरीको राजविराजस्थित गजेन्द्रचोकमा बिक्री गर्न राखिएको केराको घरी छठ पर्वका लागि खरिद गर्दै सर्वसाधारण । यहाँ अहिले रु ७०० देखि रु एक हजारसम्ममा केराको घरी बिक्री भइरहेको व्यापारी बताउँछन् । तस्बिरः अरुणकुमार यादव/रासस
सर्लाहीको बरहथवास्थित सोती खोला किनारमा छठघाट निर्माण हुँदै । तस्बिर: सिंगबहादुर थापा/रासस
सर्लाही सदरमुकाम मलङ्गवा–९ स्थित जनसागर बजारमा छठ पर्वका लागि केरा खरिद गर्दै ग्राहक । तस्बिरः विश्वनाथ ठाकुर/रासस
