काठमाडौं । चर्चित गायक प्रकाश सपुतले नेपाली समाजमा विभेद हट्दै गएको भन्दै खुसी व्यक्त गरेका छन् । सपुतले तिहारको टीकाको दिन सामाजिक सञ्जालमा स्टाटस लेख्दै आफूले बाल्यकालमा देखेको विभेदबारे पनि स्मरण गरेका छन् ।
प्रकाशले यस पटक शान्ति सुनार र तेजु छन्त्यालसँग टीका लगाएका छन् । उनले आफू शहरपछि चाडपर्वले जोडका सहज सम्बन्धका विषयमा पनि लेखेका छन् ।
चाडपर्वले जोडेको सहज सम्बन्धका बारेमा आफू शहर पसेपछि देखेका केही सुन्दर दृष्यको उदाहरण प्रस्तुत गर्दै गायक प्रकाशले लेखेका छन्–
अल्लि पहिल्यै देखि काठमाण्डौ बस्दै आउनुभएका लमजुङकि गायिका शान्ती सुनार दिदि र आफ्नै गाउले तेजु छन्त्याल बहिनिले म काठमाडौं पसेपछि शुरुवाती दिनमा निकै सहयोग गर्नु भयो । कार्यव्यस्तताले गाउ जान नसकेपछि मैले उहाहरुसँग तिहारको टिका लगाउन थाले । शान्ती दिदीसँग गायक सञ्जय गुरुङ दाई र मैले टिका लगाउँथ्यौ । तेजु बहिनीका श्रीमान जितेन्द्र राम्जाली मगर ज्वाईले एकजना अमृता विश्वकर्मा दिदीसँग टीका लगाउनु हुन्छ । अमृता दिदीका श्रीमान् राजन विश्वकर्मा दाईले एकजना ठकुरी दिदीसँग टिका लगाउनु हुन्छ । शुरुका वर्षहरुमा काठमाडौंमा अधिकांश चाडपर्व हामीले रवि गौचन थकाली सर को घरमा मनाउँथ्यौ । चाडपर्वले जोडेको यो सहज सम्बन्धहरु म शहर पसेपछि देखेको सबैभन्दा सुन्दर दृश्य हुन् । यस्तो अभ्यास विदेश बस्ने नेपालीहरु बिच पनि छ । म सानो छँदा सबैभन्दा बढी समाजमा विभेद र अफ्ठ्यारो मैले चाडपर्वमा देख्थे यो समयमा धेरै धर्मको कुरा जोडेर महिला र दलितहरुलाई असहज बनाईन्थ्यो ।
यसरी चाडपर्वहरुलाई धार्मिक, सांस्कृतिक रुपमा मात्रै होईन विभिन्न समुदाय विच अन्तरघुलन गराएर समाजलाई परिवर्तन गराउने माध्यमको रुपमा पनि मनाउन सकिने रहेछ है ।
तिहार राम्रै भयो नि ? ल शुभकामना छ है ।
