हिजो (शनिबार) दिउँसो प्रधानमन्त्रीको सरकारी निवास बालुवाटारमा एउटा अचम्मको दृश्य देखापर्यो । त्यस्तै १२ बजेतिर तीन जना पूर्वप्रधानमन्त्रीहरु आफ्ना सुरक्षा दस्तासहित प्रधानमन्त्री निवासको गेटभित्र पसे । गेटमा त कुनै समस्या भएन किनभने सुरक्षाकर्मीले उहाँहरुका स्कटिङका सवारीका लागि गेट खोली नै हाल्यो । तर भित्र गएपछि भने उनीहरु सरासर प्रधानमन्त्रीको निवास भित्र छिर्न पाएनन् । त्यस्तै आधाघन्टाजति उनीहरु बाहिरै घाममा उभिए, बसेनन् । पछि प्रधानमन्त्रीको सचिवालयका एकजना आए र उनीहरुसँग केका लागि प्रधानमन्त्रीलाई भेट्ने भनेर सोधे । नेकपाका कार्यकारी अध्यक्ष प्रचण्डले भने– सचिवालय बैठक बस्न आएको नि । उनी भित्र छिरे र प्रधानमन्त्रीसँग केही साधेर आए । अनि एकैछिन् बस्नु भनेपछि तीन भाई पूर्वप्रधानमन्त्रीहरु झलनाथ खनाल, पुपष्पकमल दाहाल प्रचण्ड र माधव नेपाल करिब आधाघन्टा घाममा उभिए । पछि बोलावट आयो र भित्र गए । उनीहरु बैठक कोठाको ढोकाबाट भित्र छिर्नासाथै शुरुभयो भनाभन् । प्रधानमन्त्री ओली र प्रचण्ड मुखामुख गर्न थालेपछि साथ लागेर गएका दुई उपप्रधानमन्त्री बामदेव र नारायणकाजी हेरेको हेर्यै भए । यत्तिकैमा प्रचण्डले सचिवालय बैठक बोलाउन ओलीलाई भने अनि ओलीले प्रश्न गरे ‘किन बोलाउने बैठक ?’
बैठकमा छलफल हुने र पार लाग्ने देखिएन । चर्काचर्कीमात्र भएपछि पाँच भाइले चार लाइनको आवेदन ड्राफ्ट गरे– श्री अध्यक्षज्यू पार्टीमा समयसामयिक विषयमा छलफल गर्नुपर्ने भएकोले आजै या भोलि नै सचिवालय बैठक बोलाइयोस् । त्यो निवेदन हातमा थमाएर उनीहरु बालुवाटारबाट बाहिरिए नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डसहित पाँच जना सचिवालय सदस्यले प्रधानमन्त्री तथा अर्का अध्यक्ष केपी शर्मा ओलीलाई भेट्न त्यहाँ पुगेका हुन् । शनिबार बालुवाटार पुगेका भेटमा उनीहरूले सचिवालय बैठक माग गर्दै प्रधानमन्त्रीलाई भनेपछि प्रधानमन्त्री बैठक बोलाउन सहमत भएनन्, त्यसपछि लिखित पत्र बुझाएका हुन् ।
पत्रमा कोभिडका बेला भइरहेका कामहरूको समीक्षा र पार्टी निर्णय कार्यान्वयनबारे छलफल गर्नुपर्ने भएकोले सो बैठक माग गर्दै लिखित पत्र बुझाएको पार्टी प्रवक्ता नारायणकाजी श्रेष्ठले बताए ।
लिखित पत्र बुझेपश्चात् प्रधानमन्त्रीले छलफलपछि मात्र निर्णय गरेर बैठक बोलाइने बताए । ‘अध्यक्षज्यूले तपाईंहरू आफैं बैठक गर्दै हिँड्नुभएको छ, अब किन चाहियो र बैठक भन्दै तर त्यही पनि छलफल गरौंला भन्नुभएको बालुवाटारमा सहभागी एक सदस्यले भने । यस विषयमा आजकै छापामा खुलस्त आइसकेकोले यहाँ थप व्याख्या आवश्यक पनि नहोला ।
यता प्रमुख प्रतिपक्षी दलको कुर्सीमा आसिन काँग्रेस पार्टीको ताल फेरि त्यस्तै छ । त्यहाँ पनि यतिसम्मको विवाद छ कि हालै शुरु भएको भनिएको अनौपचारिक बैठकमा पनि विवादका विषयमा नेताहरूले गुटगत रुपमा धारणा राख्दै आएका छन् । वरिष्ठ नेता रामचन्द्र पौडेल पक्षका नेताहरुले असोज १२ गते पार्टी केन्द्रीय कार्यालयमा यस्तै लिखित पत्र नै बुझाएका छन् । पार्टीले पार्टीभित्रै दिएको ज्ञापनपत्र भनिएको सो १६ बुँदे लिखित पत्रमा पार्टीमा सभापतिले एकलौटी गरेकोले त्यसको भण्डाफोर गरिने धम्की छ ।
यता संस्थापन पक्षीय नेताहरुको भने ज्ञापनपत्रमा उठाइएका विषयहरूको प्रतिवाद जारी छ । पौडेल पक्षले क्रियाशील सदस्यता, केन्द्रीय विभागको गठन, पार्टीका भ्रातृ तथा शुभेच्छुक संस्था र विदेशस्थित जनसम्पर्क समितिका विषयमा विधान विपरीत निर्णय भएको भन्दै त्यसलाई सच्याउन आग्रह गरेको थियो । तर संस्थापन पक्षले भने सबै निर्णय विधानसम्मत भएको बताएको थियो । यस्तै बैठकमा पार्टीको १४ औं महाधिवेशनका सम्बन्धमा आवश्यक छलफल भन्दा पनि त्यही लिखित पत्रकै विषयमा बढी छलफल भइआएको छ । किनभने पौडेल पक्षले पार्टीको औपचारिक बैठक शुरु भयो कि लिखित पत्रको जवाफ मात्र खोज्ने गरेको छ ।
काँग्रेसको जस्तै लिखित पत्रको शृंखला अब उता नेकपामा पनि हिजोबाट शुरु भएको छ । सत्तारुढ पार्टीको झगडा पनि हेर्दाहेर्दै पार्टीको बैठक बोलाउनकै लागि एक अध्यक्षले अर्काे अध्यक्षलाई लिखित पत्र नै हातमा थमाउनुपर्ने अवस्थासम्म आइपुगेको छ । अब यी लिखित पत्रमाथिका छलफलहरु सानेपा र बालुवाटारमा एकपछि अर्काेगर्दै शुरु हुनेछन् । तर ती छलफलका कुनै अर्थ छ्रैनन् । किनभने यीनका ताल र सुर देखेर जनता अवाक भइसकेका छन् । देशको सबैभन्दा ठूलो भनिएको सत्तारुढ दल नेकपाका अध्यक्षद्धयको हिजो बालुवाटारमा भएको भनाभनका शब्द सुन्दा त लाग्छ यिनीहरुबाट अबको पुस्ताले केही सिक्न र लिनसक्ने केही छैन । मात्र यीनका दिमाग कुर्सी बाहेक अरु केही अटेकै छैन ।
नेकपा र काँग्रेसलाई नेपाली जनताले जिम्मेवारीसहित कुर्सीको जिम्मेवारी दिएर पठाएका छन् । नेकपालाई सत्ता र काँग्रेसलाई विपक्षीको जिम्मेवारी । नेकपाले त जनताका लागि गरेन भन्ने कुरा त महामारीका बेलामा किन निशुल्क उपचार गर्ने भनेर सर्वाेच्च अदालतलाई सरकारले लेखेको जवाफबाटै जिब्रो काढ्नुपर्ने अवस्था स्पष्टै देखिन्छ । उता काँग्रेसलाई जनताले यस्तै गैरजिम्मेवार काम सरकारले गर्ला भनेर त्यसको निगरानी र खबरदारी गर्न पठाएको हो । त्यो कामबाट काँग्रेसपनि पूरै पछि हटेको छ । उ बरु सरकारसँग नियुक्तिमा आफ्ना मान्छे कति पर्लान् भनेर जाल थापेर बसेको छ । त्यही जालमा आफ्ना मानिस नपरेपछि यता सोही दलको अर्काे पक्ष (उनीहरुकै भाषामा पौडेल पक्ष भनिने) पनि यता नेकपाजस्तै असहमति दर्ज गर्दै हिँडेको छ । यहाँसम्म कि आफ्नै दलको अध्यक्षका विरुद्धमा लिखित पत्र अर्थात् उनीहरुकै शब्दमा ज्ञापन पत्र दर्ता गराएको छ पार्टी कार्यालयमै पुगेर उता नेकपाका कार्यकारी अध्यक्षले बालुवाटारमा दर्ता गराएजस्तै ।
यीनलाई के नपुगेर यसो गरिरहेका छन् भनेर कसैले सोध्यो भने त्यसको एउटै जवाफ सत्ता हो । जनताको सेवा गर्न पाइएन, देशको नाम राख्नेगरी विकास गर्न पाइएन भन्ने विषयमा यी नेताहरुका दिमागमा रत्तीभर पनि पश्चाताप नभएको तथ्य दिन प्रतिदिन सामाजिक सञ्जालमा नागरिकले खुलाएकै छन् । त्यो भन्दा पनि बरु उनीहरु एकले अर्का गुटलाई लिखित पत्र नै दर्ता गराउँदै हिँड्न थालेका छन् त्यो पनि पार्टीभित्रै । यसैले पछिल्लो समयमा यी बालुवाटार र सानेपामा दर्ता गराइएका लिखित पत्रले नेपाली जनतालाई के दिन्छ भनेर उनीहरुलाई जनताले असंख्या प्रश्न सोधिरहेका छन् ।
