काठमाडौं । अबदेखि नेपाल सरकारले काठमाडौंमा होम आइसोलेसनमा बसेका कोरोना संक्रमितहरुको बारेमा घर घरमै पुगेर निगरानी गर्ने तयारी गरेको जनाएको छ। स्वास्थ्य तथा जनसंख्या मन्त्रालयले यस विषयमा आज जानकारी दिएको हो । होम आइसोलेसनमा बसेका संक्रमितहरू घरबाट बाहिर निस्किने गरेका समाचारहरु आइरहेको भन्दै जसका कारण संक्रमण थप फैलिएको सो मन्त्रालयले जनाएको हो ।
त्यसैले त्यस्ता संक्रमितहरूको निगरानी गर्ने तयारी सरकारले गरेको बताइएको हो। मन्त्रालयका कोभिड फोकल पर्सन महेन्द्रप्रसाद श्रेष्ठले त्यसका लागि उपत्यकाका टोलटोलमा कोभिड निगरानी समूह गठन गरिने जानकारी दिए। उनले भने प्रत्येक वडाभित्र कम्तिमा ५० घरलाई समेट्ने गरी एउटा कोभिड निगरानी समूह गठन हुन्छ र त्यहीँ समूहले घरमा रहेका संक्रमितको निगरानी गर्ने काम गर्नेछ ।
उक्त समूहमा हरेक टोलका विभिन्न व्यक्तिहरुलाई समावेश गरिने जानकारी दिइएको छ । उक्त टोलीमा हरेक टोल समाजका समाजसेवी, स्वास्थ्यकर्मी र अन्य सक्रिय व्यक्तिहरूलाई समावेश गरिने जानकारी डा।श्रेष्ठले दिए । अब उक्त समूहले नै आफ्ना टोलमा संक्रमित छ वा छैन भनेर अनुमगन गर्नेछ।
अनुगमनका क्रममा कुनै घरमा संक्रमित रहेको पाइयो भने सो समूहले ती संक्रमित घरमा बसिरहेक छन् या छैनन् या उनीहरुले के कस्तो स्वास्थ्य सतर्कता अपनाएका छन् भनेर पनि निगरानी गर्नेछ। त्यसैगरी संक्रमितको सम्पर्कमा आएका मानिसहरू पनि क्वारेन्टिनमा बसेका छन् वा छैनन् भनेर पनि सो समूहले निगरानी गर्ने बताइएको छ ।
साथै, होम आइसोलेसनमा बस्दा संक्रमितलाई स्वास्थ्यमा गम्भीर समस्या देखिए अस्पताल लैजाने काम पनि उक्त समूहले नै गर्ने श्रेष्ठ बताउँछन् र बसाइकै क्रममा संक्रमितलाई थप सहायता चाहिए उक्त समूहले नै सहयोग गर्नेछ।
सरकारले हाल संक्रमितहरू घरबाट बाहिर निस्किएका कारण संक्रमण फैलिरहेको निष्कर्ष निकालेको छ । त्यसैले पनि त्यस्ता व्यक्तिहरूलाई घरभित्रै राख्न यस्तो तयारी गरिएको हो ।
यस नयाँ खालको निगरानी सम्बन्धी समूह निर्माणका लागि मन्त्रालयले उपत्यकाका सबै पालिकाहरूसँग दिनदिनै छलफल गरिरहेको जनाएको छ। काठमाडौं उपत्यकाका प्रायः सबै पालिकाहरुसँग यो छलफल गरीसकेर सो समूह गठन गर्ने तयारी सरकारले गरेको छ ।
