काठमाडौँ । इंग्लिस प्रिमियर लिग फुटबलमा आर्सनलले जित निकालेको छ । गएराति भएको खेलमा आर्सनलले लेस्टर सिटीलाई ४–२ गोलले पराजित गरेको हो ।
घरेलु मैदान इमिरेट्समा २ गोलको अग्रता बनाएको आर्सनलले २ गोल खाँदै बराबरीमा गएपछि खेल रोमाञ्चक बनेको थियो ।
खेलको २० औं मिनेटमा गाब्रियल मार्टिनेलीले गोल गर्दै आर्सनललाई सुरुवाती अग्रता दिलाएका थिए । यस्तै, पहिलो हाफको इन्जुरी समयमा लियान्ड्रो ट्रोसार्डले गोल गरेपछि आर्सनल २–० ले अघि बढ्यो ।
यता, ४७ औं र ६३ औं मिनेटमा जेम्स जस्टिनले गोल गर्दै लेस्टरलाई २–२ को बराबरीमा ल्याउँदै खेलमा फर्काए ।
खेल सकिनै लाग्दा इन्जुरी समयमा लेस्टरका विल्फ्रेड एन्डीडीले आत्मघाती गोल गरेपछि आर्सनलले जिततर्फ अग्रसर भयो । कर्नरबाट आएको बललाई आर्सनलका ट्रोसार्डले प्रहार गरेको बल एन्डीडीलाई लागेर गोल भएको थियो ।
यस्तै, इन्जुरी समयमा नै काई हाभेट्रजले गोल गरे । उनी भाग्यशाली साबित भए । लेस्टरका डिफेन्डरले क्लियर गरेको बल काईलाई लागेर गोल हुने पुगेको थियो । जितसँगै आर्सनले ६ खेलबाट १४ अंकका साथ तालिकाको तेस्रो स्थानमा छ । लेस्टर ३ अंकका साथ १६ औं स्थानमा छ ।
यस्तै, शनिबार नै भएको अर्को खेलमा म्यान्चेस्टर सिटीले न्युक्यासल युनाइटेडसँग बराबरी खेल्दै अंक बाँडेको छ । खेलको ३५ औं मिनेटमा होस्को जिभार्डिओलले गोल गर्दै सिटीलाई खेलमा अग्रता बनाएका थिए ।
तर, ५८ औं मिनेटमा एन्थोनी गोर्डनले गोल गर्दै घरेलु टोलि न्युक्यासललाई बराबरीमा ल्याए । त्यसपछि दुबै टोलिले गोल गर्न सकेनन् र १–१ को बराबरी खेल्दै अंक बाँडे ।
बराबरीसँगै ६ खेलबाट १४ अंक जोडेको सिटी तालिकाको दोस्रो स्थानमा छ भने न्युक्यासल ११ अंकसहित सातौं स्थानमा छ ।
