काठमाडौ । सत्तारुढदल नेपाल कम्युनिष्ट पार्टी (नेकपा)को सचिवालय बैठक सकिएलगत्तै सचिवालय सदस्य ईश्वर पोखरेल र स्थायी समिति सदस्य शंकर पोखरेलले खरो टिप्पणी गर्नुभएको छ । सामाजिक संञ्जाल फेसबुकमा स्टाटस लेख्दै उहाँहरुले सचिवालयको निर्णय प्रति घुमाउरो हिसाबले असन्तुष्टि जनाउनु भएको छ ।
उपप्रधानमन्त्री समेत रहनुभएका सचिवालय सदस्य पोखरेलले लेख्नु भएको छ –आफूमाथि लगाइएका “ तथ्यहीन , आधारहीन, पार्टी एकतामा गंभीर रूपमा आँच पुर्याउने मनसाय र उद्देश्यबाट प्रेरित आरोपहरू” लाई आफूले अस्वीकार गर्ने र खारेज गर्ने उद्घोष गर्नुभएको छ केपी शर्मा ओलीले , सचिवालयको बैठकमा । त्यसको व्यवस्थित र सामग्रिक रूपमा खण्डन गर्ने कुराको समेत घोषणा गर्नुभएको छ , उहाँले ।
यी आरोपहरूको छिनोफानो नगरी पार्टी एकताको प्रकृयालाई अगाडि बढाउन सहज र संभव नहुने कुराको समेत उल्लेख गर्नुभएको छ ।
यो गंभीरतालाई पार्टी एकताको पक्षमा उभिनु भएका नेकपाका सबै तहका नेता , कार्यकर्ताहरूले बुझौं र त्यसै अनुसार आफूलाई तयार बनाऔं ।
उता लुम्बिनी प्रदेशका मुख्यमन्त्री समेत रहनु भएका स्थायी समिति सदस्य शंकर पोखरेलले लेख्नु भएको छ –पार्टी एकताको भावना विपरित आएको एकल प्रस्ताव फिर्ता गरेर साझा प्रस्ताव बनाउनु पर्नेमा सचिवालय वैठकले प्रधानमन्त्री समेत रहेका प्रथम अध्यक्षलाई वैठकमा अर्को प्रस्ताव ल्याउन समय दिएछ ।
पार्टी एकताले पूर्णता नपाउदै समानन्तर दस्तावेज वाटो एकतातर्फको वाटो अवश्य होइन । १० दिनको समयलाई एउटै दस्तावेज बनाउने काममा सदुपयोग गर्न सचिवालयका कमरेडहरु गंभीर बन्नुहोस् । अन्यथा महासचिवको भनिएको सार्वजनिक प्रस्तावले लखेट्न सुरुगर्ने छ ।
