काठमाडौं । इन्डोनेसियाको टुरिजम तथा क्रियटिभ इकोनोमी मन्त्रालयकी पर्यटन उपमन्त्री नी माडे आयु मार्थिनी नि माडेले नेपालले पर्यटन क्षेत्रबाट प्रचुर लाभ लिन सक्ने भन्दै पर्यटन प्रवर्द्धनका लागि लाग्नुपर्ने बताउनु भएको छ ।
नेपाल भ्रमणका रहेका बेला गत हप्ता काठमाडौँमा न्यूजपोलारसँग भएको कुराकानीमा उपमन्त्री माडेले प्रकृतिले नै नेपाललाई प्रचुर अवसर दिएकाले यसको उपयोग नेपालले गर्न सक्ने बताउनु भएको हो । उहाँले इन्डोनेसियाको उदाहरण दिँदै नेपालमा कृतिम भन्दा प्राकृतिक उपहारहरु धेरै रहेकाले यसैलाई व्यवस्थित गर्दै पर्यटन प्रवर्द्धन गर्न सकिने सुझाव दिनुभयो ।
उहाँले आफु पहिलो पटक काठमाडाैँ आउदा बच्चादेखिको नेपाल आउने सपना पुरा भएको अनुभव पनि सुनाउनु भयो । उहाँले भन्नुभयो– मन्दिर नै मन्दिरको सहर काठमाडौँ मलाई बाली जस्तै लाग्छ । काठमाडौँ निकै भावपूर्ण र स्नेही लाग्छ उहाँले भन्नुभयो । नेपाल र इन्डोनेसिया हिन्दू र बौद्ध धर्माका लागि एक अर्काका लागि पर्याय हुने भन्दै उहाँले इन्डोनेसिया र नेपाल नागरिक तहमा नै सहज रुपमा जोडिन सक्ने धारणा राख्नुभयो ।
उपमन्त्री मार्थिनीले नेपालको कला, संस्कृति र सुन्दरताले आफू मोहित भएको बताउँदै नेपालको पर्यटन प्रवद्र्धनका लागि आफ्नो तर्फबाट सहयोग गर्ने प्रतिबद्धता पनि व्यक्त गर्नुभयो ।
‘नेपाल साँच्चिकै सुन्दर देश रहेछ । यहाँको आतिथ्यता र यहाँका नागरिकको व्यवहारले म साँच्चिकै मोहित भएकी छु । नेपालमा पर्यटनको पर्याप्त सम्भावना देखेकी छु । नेपालको पर्यटन प्रवर्द्धनका लागि म आफ्नो तर्फबाट सक्दो प्रयास गर्ने प्रतिबद्धता व्यक्त गर्दछु,’ उहाँले भन्नुभयो ।
उहाँले पर्यटन प्रवर्द्धनमा नेपाललाई सहयोग गर्न तयार रहेको जानकारी गराउँदै केही सुझाबहरु पनि दिनुभयो । उहाँको भनाई थियो‐ नेपाल आफैमा पर्यटकका लागि प्रख्यात छ । यहाँको इकोसिस्टम नै आफैमा राम्रो छ । तर यसका लागि दक्ष जनशक्तिका साथ होटल रेष्टुरेन्ट, यातायात टुर गाइड, पर्यटकीय गन्तव्यहरुको परिचय सहज बनाउनुपर्छ । फोहर व्यवस्थापन तथा सेवा सत्कारमा सुधार गर्नुपर्छ । इन्डोनेसियाले यिनै विषयहरुलाई बढी प्रथामिकता दिएको छ । हामीसँग पनि पर्यटकीय विकासका अनुभव र उदाहरणहरु छन् ।
उहाँले पछिल्ला केही बर्ष यता नेपाली पर्यटकहरुको रोजाइमा इन्डोनेसिया पनि पर्ने गरेको जानकारी दिनुभयो । नेपालबाट इन्डोनेसिया जाने पर्यटकको संख्या सन् २०२२ को तुलनामा सन् २०२३ मा १८६ प्रतिशतले बढेको बताउनुभयो । साथे पर्यटक संख्या सन् २०२४ को जनवरीदेखि जुलाईसम्ममा सन् २०२३ को सोही अवधिको तुलनामा ५ हजार भन्दा बढीले अर्थात् ७०.४८ प्रतिशतले वृद्धि भएको पनि उहाँले जानकारी दिनुभयो । सन् २०२३ को सोही महिनाको तुलनामा नेपाल आउने पर्यटकको संख्या ९१.९ प्रतिशतले बढेको छ ।
उपमन्त्रीले इन्डोनेसिया भ्रमण गर्ने नेपाली पर्यटकको बढ्दो संख्याले आफूहरू उत्साहित रहेको पनि हामीसँगको कुराकानीमा बताउनुभएको थियो ।
पर्यटकको बढ्दो संख्याले इन्डोनेसिया नेपाली पर्यटकहरूका लागि अझ बढी लोकप्रिय हुँदै गइरहेको र साहसिक पर्यटनको नयाँ गन्तव्यको रूपमा पनि विकसित भइरहेको मार्थिनीले बताउनु भयो ।
नेपाली पर्यटकलाई इन्डोनेसिया जान अझै पनि सीधा सम्पर्कको सुविधा नरहेको उहाँको भनाई थियो । सिधा उडानका लागि र भिसाको सहजताका लागि पहल भैरहेको जानकारी दिदै उहाँले भन्नुभयो– नेपालसँग प्रत्यक्ष सम्पर्क नभए पनि अन्य सहर वा पर्यटकीय हब भएका देशहरू, जस्तै मलेसिया, सिंगापुर लगायतको कनेक्टिभिटीलाई उपयोग गर्नुपर्ने अबस्था छ ।
भिसा शुल्क र सीधा उडानका बारेमा इन्डोनेसिया सरकारले थप क्रियाशीलता लिएको उहाँको भनाई थियो । बाली र अरु पनि विभिन्न पाँच स्थानका पर्यटकीय गन्तव्यका लागि इन्डोनेसियाले काम गरिरहेको उहाँको भनाई थियो । उहाका अनुसार इन्डोनेसियामा लेक टोबा, बोरोबुदुर मन्दिर, मण्डलिका, लाबुआन बाजो र लिकुपाङका प्रमुख पर्यटकीय क्षेत्र छन् ।
उहाँले दुई देश मिलेर धार्मिक पर्यटन क्षेत्रको साझेदारीका साथ विकास गर्न सकिने धारणा पनि उहाँले सुनाउनुभयो । उहाँले भन्नुभयो‐ नेपालीहरु खास इन्डोनेसिया जानेमध्ये धेरैले बालीलाई रोज्ने गरेको हामीले पाएका छौँ । किनभने बाली धार्मिक सद्भाव कायम रहेको विश्वकै उत्कृष्टमध्येको एक सहर हो । यसको अध्ययनका लागि पनि विश्वका धार्मिक पर्यटन जाने गरेका छन् ।
त्यसैगरी इन्डोनेसियाका हिन्दू नागरिकहरु पनि काठमाडौँ आउन चाहने गरेका छन् । उनीहरुले काठमडौँलाई मन्दिरको सहर र नेपाललाई पशुपतिनाथको देश भनेर चिन्ने गरेका छन् । यसकारण पनि नेपाल र इन्डोनेसिया मिलेर काठमाडौँ र बालीको पर्यटन विकासका साझा कार्यक्रम पनि बनाउन सकिन्छ ।
पर्यटकीय हिसाबले हेर्दा इन्डोनेसिया र नेपालका बीचमा समानता रहेको उहाँको भनाई थियो । यसकारण पनि धार्मिक पर्यटनको विकासमा दुबै पक्ष मिलेर काम गर्न सकिने उहाँले बताउनुभयो ।
उहाँले भन्नुभयो‐ पहिलो कुरा त हामीले काठमाडौँ आउन खोज्ने बालीका नागरिकलाई र बाली जान चाहने नेपालीहरुलाई सहजता प्रदान गर्नका लागि सीधा उडानको प्रबन्ध गर्न सकिन्छ । दोस्रो उनीहरुका लागि आपसमा भिसासम्बन्धी व्यवस्थालाई सहज र सर्वसुलभ बनाउन सकिन्छ । अनि तेस्रो कुरा के भने धार्मिक पर्यटनको विकासका लागि साझा धारणा र कार्यक्रमहरुका साथ अघि बढ्न सकिन्छ ।
उहाँले बाली जोन नेपालीहरुको बढ्दो संख्या देखेर आफू निकै उत्साहित भएको सुनाउँदै ती नेपाली पर्यटकहरूलाई सहज पहुँच प्रदान गर्न सरोकारवालाहरूसँग थप सहकार्यलाई जारी राख्ने प्रतिबद्धता पनि जनाउनु भयो ।
