काठमाडौँ । इंग्लिस प्रिमियर लिग फुटबलमा साविक विजेता म्यान्चेस्टर सिटी र उपविजेता आर्सनलले बराबरी खेलेका छन् ।
गएराति भएको खेलमा दुबै टिमले २–२ गोलको बराबरी खेल्दै अंक बाँडेका हुन् । घरेलु मैदान इतिहाडमा खेलको नवौं मिनेटमा नै एर्लिङ हालाण्डले गोल गर्दै सिटीलाई सुरुवाती अग्रता दिलाएका थिए ।
२२ औं मिनेटमा रिकार्डो कालाफिओरीले गोल गर्दै आर्सनललाई १–१ गोलको बराबरीमा ल्याए ।
यता, पहिलो हाफको इन्जुरी समयमा गाब्रियलले गोल गर्दै पाहुना टोली आर्सनललाई २–१ ले अघि बढाए । उनले कर्नरबाट आएको बललाई हेडरमार्फत गोल गरेका थिए ।
अर्कोतर्फ पहिलो हाफको इन्जुरी समय नै आर्सनललाई महँगो साबित भयो । लियान्ड्रो ट्रोसार्डले दोहोरो पहेँलो कार्डपछि रातो कार्ड खाएर बाहिरिएपछि आर्सनल १० खेलाडीमा समेटियो ।
यता, खेल सकिनै लाग्दा इन्जुरी समयमा जोन स्टोन्सले गोल गर्दै सिटीलाई हारबाट जोगाए । यो नतिजासँगै सिटी ५ खेलबाट १३ अंकका साथ शीर्षस्थानमा छ भने ११ अंकसहित आर्सनल चौंथो स्थानमा छ ।
