हामीले सत्य सूचनायात्राको चार बर्ष पूरा गरेर पाँच बर्षमा प्रवेश गरेका छौँ । सुन्दा चार बर्षमात्र लागे पनि यो यात्राले अनेक कल्पनीय र अकल्पनीय आरोह अवरोह पार गरेको छ । यस क्रममा जोडिएर हामीलाई साथ र सहयोग प्रदान गर्नुहुने सबैमा हार्दिक कृतज्ञता व्यक्त गर्दछौँ । साथै यो यात्रालाई अनन्त यात्रासम्म पुर्याउनका लागि यहाँहरुको साथ र सहयोग अहिलेकै जस्तो अपेक्षित छ ।
वास्तवमा सूचनाका दायाराहरु दिनप्रतिदिन फराकिलो बन्दै छन् तर मिडिया भने साँघुरिँदैछन् । यही घेराभित्रबाट हामीले सेवा दिनुपर्नेछ र नागरिकलाई बढीभन्दा बढी मात्रामा सुसूचित गर्नुपर्नेछ । तर यो सेवाका लागि हामी प्रतिबद्ध छौँ र यहाँहरुले छोटै समयमा हामीलाई प्रदान गरिरहनुभएको माया र सद्भावबाट आगामी दिनका लागि थप उत्साहित भएका छौँ । त्यसैले हामी आगामी यात्रा थप सशक्त र विस्तारित बनाउँदै अघि बढ्ने प्रण पनि आजकै दिनमा गर्दछौँ ।
विश्वव्यापी कोरोना महामारीबाट थलिएका हामी विस्तारै उठ्दै छौँ । जब अकल्पनीय महामारीले विश्वलाई नै छोयो त्यस बखत हामी पनि अछुतो रहने कुरा थिएन, भएनौँ । महामारीले एकपछि अर्काे गर्दै नेपाली जनजीवनलाई थला पार्दै गयो र यसले मिडियालाई पनि नराम्ररी छोयो । जसका कारण नेपाली मिडिया पनि नराम्ररी घाइते भए । त्यस बखत अखबारहरु त पूरै शिथिल नै भए । प्रकाशनको तारतम्य समेत मिलाउन नसकेर प्रकाशन नै बन्द गर्नुपर्ने अवस्थामा धेरै पुगे र कतिले बन्द पनि गरे ।
ती अखबारहरु पछि त उठे तर पूर्ण स्वस्थ भएर होइन । जब अखबारहरु प्रकाशन गरी घरघर पुग्ने अवस्था थिएन टेलिभिजनले जुनी फेर्ने कुरा त झनै भएन । यी परम्परागत भनिएका मिडियाले अस्तित्वको संघर्ष गरिरहँदा नागरिकको आशा र भरोसा अनलाइन मिडिया माथि थपिएको थियो । हामी जन्मिँदैदेखि यस्तो गाह्रो गर्भबाट जन्मियौँ, तर अधिकांश नागरिकको भरोसा भने अनलाइनमाथि चुलिँदै थियो । यो जिम्मेबारीबाट हामीले हाम्रो यात्रालाई पाइला फुकी फुकी अघि बढाएका थियौँ । जोगीका घरमा सन्याशी पाहुना भनेजस्तै भएका मिडियाहरु घर र कोठाभित्रै सीमित भइरहनुपरेको अवस्थामा हामीले भने सत्य सूचनाको भारी बोक्दै लौरो टेकेर अघि बढ्ने चेष्टा गरेका थियौँ ।
यस्तै यस्तै जंघार छिमलेर आज यहाँसम्म सकुशल आइपुगेका छौँ । मुलुक अहिले पनि ‘पोष्ट कोरोना एरा’ मा छ भन्दा हुन्छ । मुलुकको अर्थतन्त्र जुरुक्क उठ्न सकेको छैन भने महामारीले थला पारेको पर्यटन क्षेत्र यसो उठ्ने तरखरमा सल्बलाउँदैछ । अर्थको आडमै हो मिडिया बाँच्ने पनि । विज्ञापनमा अडिनुपर्ने व्यवसाय अर्थको आडै नपाई केमा टेक्नु ? त्यसैले मुलुकको मिडिया क्षेत्र पनि व्यापार ब्यवसायको पछिपछि उठ्न धुलो टकटकाउँदैछ । यही भिडको बीचतिर कतै छौँ हामी पनि । महामारीबाट बँचेर उठ्न खोजेको बिरामीजस्तै अरु मिडियाहरुकै वरिपरि हामी पनि यसो धन्तङाउँदै छौँ । आजको यस अबस्था र अवसरमा अबको यात्रा हिजोको जस्तो नहोस् भन्ने हाम्रो कामना छ र त्यो संसारको कल्पना कसैले पनि गर्न नचाहेकाले हाम्रो आगामी दिनहरुप्रनि सबैको शुभेच्छा पनि अपेक्षित नै छ ।
सञ्चारमाध्यको संख्या साँघुरिँदै गए पनि सूचनाको बजार भने तन्किँदै गएको छ । पहिलेजस्तो अक्षरलाई कम्पोज गरेर छापाखानाबाट खबर रातरभर छापेर निकाल्नुपर्ने अवस्था अब छैन । बरु एक क्लिकमै आजको सूचना विश्वव्यापी बन्दैछ । यही खबरको प्रतिस्पर्धी दुनियाँकै भिडमा हामी पनि छौँ । आगामी दिनको यात्राको यो प्रण गर्छौँ कि यो भिडमा हामी हराउने होइन कि फरक उपस्थितिका साथ रहने छौँ । हामीले प्रिय पाठकहरु त खोजौँला तर पनि त्यो भन्दा बढी पाठकहरुले हामीलाई खोजिरहने अवस्था हामी सिर्जना गर्नेछौँ । यसका लागि आजैको यस अवसरमा हामीलाई सबै पाठकहरुको आशीर्वादको आवश्यकता छ ।
संविधान दिवसको दिन पारेर सुरु गरिएको हाम्रो यात्राले आज चार बर्ष पूरा गरेको छ । आज मुलुकले नवौँ संविधान दिवस मनाइरहेका अवसरमा हामी पनि शुभकामना व्यक्त गर्दछौँ । संविधानले प्रदान गरेको प्रेस स्वतन्त्रताकै धरातलमा हामी उभिएकाले यो संविधानको रक्षा हाम्रो पनि प्रमुख कर्तव्य हो भन्ने हामीले बोध गरेकै छौँ र प्रेस एवं नागरिक स्वतन्त्रताप्रेमी सबैमा संविधान रक्षा र पालनाका लागि आह्वान पनि गर्दछौँ । यो यात्रामा हरसम्भव साथ दिई यहाँसम्म आइपुग्ने सबै कर्मचारी साथीहरु विशेष धन्यवादका पात्र छन् । साथै हामीलाई माया गर्नुहुने सबैमा शुभकामना र धन्यवाद छ ।
ताजा, नयाँ र सत्यतथ्य सूचना पस्किने हाम्रो काम निरन्तर रहने छ । सूचनाको यो अविरल यात्रामा अहिलेजस्तै स्पात र अब्बल भएर आगामी दिन पनि पाठकहरुको मनमुटुमा रहीरहन सकौँ । सबैमा हाम्रो धेरै धेरै शुभकामना र धन्यवाद ज्ञापन गर्दछौँ ।
