काठमाडौ । सत्तारुढदल नेपाल कम्युनिष्ट पार्टी (नेकपा) भित्र शिर्ष तहमा अन्तरकलह चर्किदै जाँदा त्यसको प्रभाव पूर्णरुपमा एकिकृत हुन नसकेको पार्टीका तल्ला तहसम्म पुगेको छ । मंसीर ३ गते कार्यकारी अध्यक्ष पुष्पकमल दाहालले प्रधानमन्त्री तथा पार्टी अध्यक्ष केपी ओली माथी विभिन्न प्रश्न उठाउँदै सचिवालयको बैठकमा प्रस्तुत गर्नुभएको प्रतिवेदन समेत समेटेर पार्टीका तल्लातहसम्म वितरण गरिएको छ । प्रतिवेदनमा सचिवालयको बैठक बोलाउन पेश गरिएको निवेदन, अध्यक्ष ओलीले दाहाललाई पठाएको पत्र , पत्रमा लगाईएको तोकको व्यहोरा र अध्यक्ष दाहालले प्रस्तुत गर्नुभएको १९ पानाको प्रतिवेदन समेटिएको छ ।
तल्लो तहमा प्रतिवेदन पुगेपछि उता अध्यक्ष ओली पक्षले बुधबार काठमाडौंको एक होटलमा आफूनिकट विद्यार्थीहरुको भेला आयोजना गरेको छ । जहाँ ओली निकट नेताहरुले पछिल्लो अवस्था र पार्टी भित्रैबाट सृजना गरिएको असहयोगका बारेमा जानकारी गराउँदै केही निर्देशनहरु दिने बुझिएको छ ।
यसअघि पनि अध्यक्ष ओली निकट नेताहरुले विभिन्न जनबर्गिय संगठनहरुको माध्यामबाट आफु निकट नेता तथा कार्यकर्ताहरुसँग अन्तरक्रिया गर्दै आईरहेका छन् । उता माधव नेपाल समुहले पनि आफु निकट नेता तथा कार्यकर्ताहरु भेलालाई तिव्रता दिएको छ । चितवनमा हो– हल्ला बिच कार्यक्रम गरेर फर्किनु भएका नेता सुरेन्द्र पाण्डेले २ दिन पछि पोखरामा कार्यकर्ताहरुसंग अन्तरक्रिया गर्नुभयो ।
नेपाल समुहले आउँदो शुक्रबार, शनिबार र आइतबार ललितपुरका स्थानीय तहको भेला आयोजना गर्न लागेको छ । मंगलबार पनि अध्यक्ष दाहालको निवास खुमलटार र बरिष्ठ नेता नेपालको निवास कोटेश्वर विभिन्न छलफल भएका थिए । मंगलबार परराष्ट्रमन्त्री प्रदीप ज्ञावलीले अध्यक्ष दहालसँग छलफल गर्नुभएको थियो । मंगलबार नै बरिष्ठ नेता झलनाथ खनाल, उपाध्यक्ष बामदेब गौतम, प्रवक्ता नारायणकाजी श्रेष्ठ बिच छलफल भएको थियो ।
उता बालुवाटारमा अध्यक्ष दाहाललको पत्रको लिखित जवाफ तयार गर्न लुम्बिनी प्रदेशका मुख्यमन्त्री तथा स्थायी कमिटी सदस्य शंकर पोखरेल र प्रधानमन्त्रीका राजनीतिक सल्लाहकार विष्णु रिमाल लागिरहनु भएको स्रोतले जनाएको छ । नेकपा सचिवालयको बैठक मंसिर १३ गते बस्दैछ । अध्यक्ष ओलीले दाहालले उठाएको सबै प्रश्नको तथ्थ सहित प्रतिबाद गर्ने बताउँदै आउनु भएको छ ।
