काठमाडौँ । बिहीबार पाँचथरको फालेलुङ गाउँपालिका–५ डाँडागाउँमा बम विस्फोट हुँदा दुईजना नाबालकले ज्यान गुमाए । मृत्यु हुनेमा फालेलुङ–५ डाँडागाउँका दिलीप साँवाका ११ वर्षीय छोरा दीपसन साँवा र दुई वर्षीया छोरी प्रिन्सा रहेका छन् ।
डाँडागाउँस्थित आइतराज केरुङको घरनजिकैको अम्रिसो बारीमा भेटिएको उक्त बम नाबालकहरूले खेलाउँदा विस्फोट भएको बताईएको छ ।
युद्धकालमा ल्याएर राखेको उक्त बम अहिले विस्फोट भएको प्रहरीको अनुसन्धान निष्कर्ष छ । बम विष्फोट भएको घरधनी आइतराज केरुङ माओवादी केन्द्र सशक्त संघर्षमा हुँदा पार्टी कार्यकर्ता थिए । ०६२ सालयता भने उनी सदरमुकाम फिदिममा व्यवसाय गरेर बस्छन् । उनको खाली रहेको घरमा अहिले ज्ञानबहादुर राईको परिवार बस्छन् ।
माओवादी कार्यकर्ताको घर नजिकै खिया लागेको अवस्थामा भेटिएको बम द्वन्द्वकालकै रहेको कोशी प्रदेशका डीआईजी चन्द्र कुबेर खापुङले बताए । कति वर्ष पुरानो हो भन्ने चाहिँ नेपाली सेनाले फरेन्सिक जाँच गरेपछि मात्रै थाहा हुने उनले बताए ।
अहिले विस्फोट गराउने उद्देश्यले बम राखेको पुष्टि नभएको डीआईजी खापुङको भनाई छ । द्वन्द्वकालमा कसैले बारीमा लुकाएर बिर्सिएको हुनसक्ने उनले बताए ।
उक्त स्थानमा अर्को एक थान बम पनि फेला परेकोमा सैनिक टिमले निष्क्रिय बनाएको छ । बम ह्याण्डमेड जस्तो देखिएको डीआईजी खापुङले बताए ।‘डिस्पोज गरेको बम ह्याण्डमेड सकेट हो, बिस्फोट भएको पनि ह्याण्डमेड सकेट हो भन्नेछ । कति वर्ष पुरानो हो भन्ने फरेन्सिक जाँच पछि खुल्छ’, उनले भने ।
