काठमाडौँ । जनता समाजवादी पार्टी, नेपालका सांसद राजकिशोर यादवले सरकारले एउटा पनि गणना गर्न लायक काम गर्न नसकेको टिप्पणी गर्नुभएको छ ।
केपी ओली नेतृत्वको सरकार बनेयता औँलामा गन्न सकिने कुनै एउटा पनि काम हुन नसकेको उहाँको भनाई थियो । बुधवार प्रतिनिधि सभा बैठकमा विशेष समय लिएर बोल्दै सांसद यादवले सरकारले गफ भने ठूलोठूलो लगाउने गरेपनि काम केही पनि गर्न नसकेको बताउनु भयो । यो सरकार बनेको दिनदेखि अहिलेसम्म हेर्दा गफ ठूलो गर्ने तर काम चाहीँ एउटा पनि औँलामा गन्नसक्ने खालको नभएको सांसद यादवले दाबी गर्नुभयो । उहाँले संविधानको आत्माको रुपमा रहेको समावेशितालाई उल्लंघन गरेर सरकारले राजदुत नियुक्ति गरेको पनि दोहोर्याउनु भयो ।
सांसद यादवले भन्नुभयो, ‘सरकारले संविधान मान्नुपर्छ कि पर्दैन ?हामीले यो संविधान लेख्दा यो संविधानको आत्मा समानुपातिक समावेशीमा छ । तर सरकारले अहिले राजदुतहरुको जुन सिफारिस गरेको छ । त्यो कुनै पनि कोणबाट समावेशी देखिँदैन । त्यो एक प्रकारको एकल जातीय, एकल सांँस्कृतिक पहिचान झल्किने गरी सिफारिस गरिएको छ । यदि सरकारले संविधान मान्दैन भने भोली यो संविधान जनताले मान्दिन भन्यो भने परिस्थिति के उत्पन्न होला ? सम्माननीय सभामुखमार्फत म यो सरकारसँग सोध्न चाहन्छु । त्यसैगरी यो गरिमामय सदनको जुन प्रकारको सत्तापक्ष र विपक्षको रोइलो, दोहोरी सुन्दा यो पूरै राज्यसत्ता, पूरै सरकार अहिले विद्युत प्राधिकरण र ट्रक लाईनमा झल्झेको जस्तो देख्छु । यो सरकार बन्दा नेपाली जनतामा यो संसदीय व्यवस्थामा विरलै घटने घटना स्वरुप यो पहिलो र दोस्रो दल मिलेर बनेको सरकार हो । र, यो एक प्रकारको अन्तिम विकल्प हो । यो सरकारलाई असफल हुने, यो सरकारलाई अल्छि गर्ने, यो सरकारलाई कुनै पनि रुपमा जनताको समस्यालाई समाधान नगरी दायाँबायाँ हुने छुट छैन । तर समामुख महोदय, सरकार बन्दैगर्दा नेपाली जनतामा एक प्रकारको आशा र भरोसा थियो । यो सरकारले नेपाली जनताको जीविकाको सवालमा, सुशसनको सवालमा, सामाजिक न्यायको सवालमा केही महत्वपूर्ण उदाहरणीय काम गर्छ । तर यो सरकार बनेको दिनदेखि अहिलेसम्म हेर्दा गफ चाहीँ ठूलो ठूलो चुट्ने, तर काम चाहीँ एउटा पनि औलामा गन्नसक्ने छैन ।’
सांसद यादवले सरकारलाई असफल हुने कुनैपनि छुट नरहेको जिकिर पनि गर्नुभयो ।
