बेलायतले अर्काे हप्तादेखि कोभिड १९ भाइरस विरुद्धको खोप प्रयोगमा ल्याउने भएको छ । यूके फाइजररबायोएनटेक खोपलाई आम रुपमा प्रयोग गर्न अनुमति दिने विश्वकै पहिलो देश बनेको समाचार आज प्राप्त भएको छ । ब्रिटिश नियामक संस्था एमएचआरएका अनुसार ९५ प्रतिशतसम्म प्रभावकारी रहेको भनिएको सो खोप आगामी सातादेखि नै लगाउन सुरु गर्न सकिने बताइएको छ । 

शुरुमा यो खोप कसलाई दिने भनेर केही दिनमै सर्वाधिक जोखिममा रहेका मानिसबाट सुरु हुने अपेक्षा गरिएको छ । यूकेले सो खोपको चार करोड मात्रा किनिसकेको र सो मात्रा कम्तीमा पनि दुई करोड मानिसलाई पर्याप्त हुने बिबिसीले जनाएको छ ।

फाइजर–बायो एनटेक औषधि इमरजेन्सी भएमा यसको प्रयोग गर्न पाइने गरी बेलायतको औषधि नियामक निकायले आज नै स्वीकृति दिएको छ । बेलायत कोभिड महामारी विरुद्धको खोप प्रयोगमा ल्याउनका लागि अनुमति दिने विश्वकै पहिलो देश बनेको पनि बिबिसीले जनाएको छ ।

आगामी हप्ता नै यो खोपको प्रयोग गर्न सकिने भएको छ । बेलायत सरकारले आगामी हप्ता नै नागरिकलाई यो खोप सेवा दिने भएको छ । 
अर्काे हप्ताका लागि अत्यन्त आवश्यक परेका र गम्भीर प्रकृतिका विरामीलाई एक करोड मात्रा तुरुन्तै उपलब्ध हुने र आठ लाख मात्रा केही दिनमा आइपुग्ने बताइएको छ । खोपको इतिहासमा यो सबैभन्दा छिटो स्वीकृति पाउने खोप बनेको छ ।

दश महिनाको अवधिमा यो खोप योजनाबाट अनुमतिसम्म आइपुगेको हो । कतिपय खोपका लागि यो अवधि एक दशकभन्दा लामो भएका थिए ।
एनएचएसका प्रमुख कार्यकारी सर साइमन स्टेभेन्सले यूकेको स्वास्थ्य सेवाले देशको इतिहासमै सबैभन्दा बृहत् खोप कार्यक्रमको तैयारी गरिरहेको बताएका छन् ।
खोप कार्यक्रमका लागि लगभग ५० अस्पताल तैयारी अवस्थामा राखिएको र अन्य खोप केन्द्रहरू तयार गर्न थालिएको छ । 

यो खोप विश्वका विभिन्न देशहरुमा नै लगेर तेस्रो चरणसम्मको परीक्षण गरिएको थियो । सो परीक्षण पास भएपछि यो खोपलाई सार्वजनिक रुपमा प्रयोगका लागि अनुमति दिइएको बताइएको छ ।

यो खोप पत्ता लागेपछि बेलायतका प्रधानमन्त्री बोरिस जोनसोनले निकै खुशी व्यक्त गरेका छन् । उनले अर्काे हप्ताबाट यो खोपको प्रयोग गर्न पाइने कुराले आफूलाई धेरै खुशी बनाएको बताए । 
उनले आफ्नो ट्वीटरमार्फत् यो निकै महत्वपूर्ण काम भएको र यसले बेलायतमात्र नभएर संसारका मानिसको ज्यान बच्ने बताए । यसबाट अब बेलायतको आर्थिक विकासमा पनि सहयोग पुग्ने उनले बताए ।