काठमाडौं । नेपाली कांग्रेस केन्द्रीय समितिको बैठक आज बस्दै छ । पार्टी कार्यालय सानेपामा बस्ने बैठकमा महामन्त्री गगन थापा र विश्वप्रकाश शर्माले पेश गरेको प्रतिवदेनमाथि छलफल हुने छ ।
गत साउन २३ गतेदेखि सुरु भएर २८ गतेदेखि रोकिएको कांग्रेस केन्द्रीय समितिको बैठकमा महामन्त्रीहरुका प्रतिवेदनलाई लिएर विवाद छ ।
महामन्त्री गगन थापाले २०८२ साल मंसिरभित्रै पार्टीको १५ औं महाधिवेशन गर्ने गरी अहिले नै मिति तोक्ने, आगामी चुनावमा गठबन्धन नगर्ने प्रस्ताव गरेका छन् । तर यो प्रस्ताव सभापति शेरबहादुर देउवा समूहलाई मान्य छैन ।
त्यसैगरी अर्का महामन्त्री विश्वप्रकाश शर्माले नेताहरुको बहिर्गमनको बाटो पहिल्याएका छन् । उनले राष्ट्रपति एक पटक, प्रधानमन्त्री दुई पटक, मन्त्री तीन पटक र सांसद चार पटकभन्दा बढी एउटै व्यक्ति बन्न नपाउने व्यवस्थासहितको प्रतिवेदन ल्याएका छन् । यो प्रतिवेदन पारित भए सभापति शेरबहादुर देउवालाई प्रधानमन्त्री बन्न रोक्ने छ । यसले पनि प्रतिवेदन परिमार्जन गरेर मात्र पारित गर्नुपर्ने बुझाइ देउवा समूहको छ ।
तर दुवै महामन्त्री आफ्नो प्रतिवेदन जस्ताको तस्तै पारित गर्नुपर्ने पक्षमा छन् । उनीहरु परिमार्जन गर्न नहुने भन्दै लबिइङ बढाइरहेका छन् ।
यसअघिको बैठकमा अधिकांश केन्द्रीय सदस्यले आफ्ना धारणा राखिसकेकाले आज पूर्व र वर्तमान पदाधिकारीहरुले धारणा राख्ने नेपाली कांग्रेसले जनाएको छ ।
