काठमाडौं । कोरोनाभाइरसको संक्रमण नेपालभित्र देखिएलगत्तै शुरू भएको विशेष कोरोना बिमा योजनामा सहभागीहरुले बिमा रकम नपाएको गुनासो बढ्दै गएपछि अर्थ मन्त्रालयले पुनः बिमा कम्पनीहरुलाई पत्राचार गरेको छ ।
यसअघि पनि अर्थ मन्त्रालयले ७ दिनभित्र बिमाको मागदाबी सेटल गर्न निर्देशन दिएको थियो, तर बिमा कम्पनीहरुले अर्थको निर्देशनलाई पूर्ण कार्यान्वयनमा ल्याएका थिएनन् ।
अर्थमन्त्रीकाे समुपस्थितिमा मंसिर १७ गते तथा अर्थ सचिवकाे संयाेजकत्वमा मंसिर १८ गते बसेकाे बैठककाे निर्णय बमाेजिम मन्त्रालयले बिमा समितिलाई ३ दिनभित्रै कोरोना बिमाको रकम भुक्तानी गरी सो जानकारी मन्त्रालयमा पठाउन कडा निर्देशन दिएको हो ।
हाल कुन कुन बिमा कम्पनीमा कति संख्यामा दाबी परेको छ सोको विवरण समेत पठाउन भन्दै अर्थ मन्त्रालयले समस्या समाधानका लागि समितिबाट के कति प्रयास भइरहेको छ र मन्त्रालयमा सहजीकरणका लागि पहल गर्नुपर्ने विषय के के हुन् भन्दै त्यसको विस्तृत विवरण पठाउन समेत निर्देशन दिएको छ ।
अर्थ मन्त्रालयद्वारा प्रेसित पत्रमा भनिएको छ ‘कोरोना बिमाको हालसम्मको दाबी संख्या, कागजात पूरा भएका दाबी संख्या, प्रमाणीकरणका लागि स्वास्थ्य सेवा विभागमा पठाएको संख्या, प्रमाणीकरण नभएका वा नक्कली दाबी विवरण, दाबी भुक्तानीको विवरण र सबै कागजात पूरा भई भुक्तानी गर्न बाँकी विवरण सार्वजनिक समेत गर्नुहुन अनुरोध छ ।’
प्राप्त विवरण अनुसार अझै १३ हजार भन्दा धेरै व्यक्तिको कोरोना बिमाको रकम भुक्तानी हुन बाँकी छ ।
देशभित्र कोरोना फैलिन शुरु हुँदा प्रत्येक कोरोना संक्रमितलाई एक लाख बराबरको बिमा गरिएको थियो, तर संक्रमितको संख्या बढ्दै गएपछि कोरोना बिमामा समस्या उत्पन्न भएको थियो ।
अर्थ मन्त्रालयले बिमा समितिलाइ लेखेकाे पत्र
