काठमाडौं । नेकपाका अध्यक्ष पुष्पकमल दाहाल प्रचण्डले अहिले अर्का अध्यक्ष केपी ओलीले अख्तियार गरेको रणनीति र पाराले पार्टी नचल्ने बताएका छन् । दाहाल र माधव नेपाल पक्षले पछिल्लो समयमा आफु पक्षीय नेता तथा कार्यकर्ताहरुको भेला गर्दै आएका छन् ।
यसै विषयमा बिहीबार साँझ पनि उनीहरुले आफू निकट रहेका बागमती प्रदेशका पार्टीका पदाधिकारीहरुसँग जुम बैठक गरेका थिए । त्यस क्रममा प्रचण्डले भनेका थिए अब ओलीसँग एक्लाएक्लै बस्ने र कानेखुसी गरेर अगाडि बढ्ने अवस्था छैन, पार्टीमा अब वार कि पार गरेर अघि बढ्नुपर्छ ।
‘पार्टी कमिटीको बैठक राखेर निर्णय लिनेभन्दा पनि कानेखुसी गरेर अगाडि जाऔं भन्नेमा केपी ओली कमरेडको धेरै जोड देखिन्छ । तर त्यसरी नहुने रहेछ, अब त्यसरी अघि बढेर पार्टीको हित पनि हुदैन’, प्रचण्डले भनेका छन् ।
सहभागी एक नेताका अनुसार प्रचण्डले सचिवालयकै नेताहरुसँग पनि कानेखुसीको नीति अवलम्बन गर्ने र धोका दिने प्रवृत्ति ओलीमा रहेको उनले बताए ।
‘अब कानेखुसी गरेर होइन, पार्टीका नेताहरुसँग छलफल गरेर सहमति निकालेर अगाडि बढ्नुपर्छ । बैठकले निर्णय गर्ने र नेतृत्वले कार्यान्वयन गर्नेतिर जानुपर्छ’, प्रचण्डले बताएको सहभागी एक नेताले जानकारी गराएका छन् । उनले बताए, ओलीको व्यवहारले आफू दिक्क भइसकेको पनि प्रचण्डले बताएका थिए ।
बिहीबार साँझको सो कार्यक्रममा प्रचण्डसँगै नेता नेपालले पनि सम्बोधन गरेको उनले बताए । उनका अनुसार सो सम्बोधनका क्रममा पहिले दुई अध्यक्ष ओली र प्रचण्ड मिलेर आफूलाई अल्पमतमा पारेको सम्झाएका थिए । तर पनि ‘दुई अध्यक्षको चोचोमोचो’ले गर्दा पार्टीमा र पार्टीका कारण देशमा नै संकट आएको पनि उनले बताए । नेता नेपालले अब दुई अध्यक्षमात्रको सहमतिले पार्टी नचल्ने बताएका थिए ।
