वर्तमान गठबन्धन कुन काँध नरम छ भन्दै विकल्प खोज्ने प्रवृत्तिको उपज होः सचिव विष्ट

काठमाडौँ । नेकपा एमालेका सचिव गोकर्ण विष्टले वर्तमान सरकार कुन काँध नरम छ भन्दै विकल्प खोज्ने प्रवृत्तिको उपज भएको बताउनुभएको छ ।

आईतवार प्रधानमन्त्री केपी शर्मा ओलीलेको पक्षमा समर्थन गर्दै सचिव विष्टले यस्तो बताउनुभएको हो । उहाँले पूर्वप्रधानमन्त्री पुष्पकमल दाहालले बारम्बार सत्ताका लागि काँध फेर्ने प्रवृत्तिका कारण नयाँ गठबन्धन बनेको बताउनु भयो । उहाँले एमाले र काँग्रेसले काँध थापिरहँदा पनि नरम काँध खोज्ने प्रवृत्तिले उपज नै नयाँ गठबन्धन भएको बताउनु भयो । सचिव विष्टले बाघको छालामा स्यालको रजाईं गर्ने कुराले कोल्टो फेरेको बताउनु भयो ।

उहाँले वर्तमान गठबन्धन कतिपयको लागि चार दिनको चाँदनी फेरि अँधेरी भएको हुनसक्ने समेत बताउनु भयो। उहाँले अहिलेको नेपाली राजनीतिमा आफू सरकारमा हुँदा मात्र लोकतन्त्र जोगिने र आफू बाहिर हुँदा खतरामा हुने भन्ने मान्यता स्थापित हुँदै गएको बताउनु भयो ।

उहाँले पूर्वप्रधानमन्त्री दाहालले सरकारबाट बाहिरिने बित्तिकै लोकतन्त्र खतरामा परेको भन्दै गरेको प्रचारमा कुनै तर्क नरहेको दाबी गर्नुभयो । उहाँले आफू सरकारमा हुँदा लोकतन्त्र जोगिने र आफू सत्ता बाहिर हुँदा लोकतन्त्र खतरामा पर्ने के लोकतन्त्र कुनै दलले निर्धारण गर्ने हो रु भन्दै प्रश्न गर्नुभयो ।

उहाँले भन्नुभयो,‘रातमा वा दिनमा जुनसुकै बेला भएको सहमति भएपनि देशलाई अग्रमण र समस्या समाधान गर्छ भने रात र दिनको प्रश्न उठाएर वर्तमान गठबन्धनप्रति अविश्वास गर्नुपर्ने कुनै कारण छैन । यो गठबन्धन कहिले यो काँधमा कहिले त्यो काँधमा हुने,दुवै काँधले थामिरहेको छ । काँध थाप्दा थाप्दा थाकि रहनेहरुले काँध थापि रहँदा पनि यो काँध भन्दा त्यो काँध नरम छ की त्यो काँध भन्दा यो काँध नरम छ । नरम काँध खोज्दै खोज्दै काँध बदल्ने प्रवृत्तिको उपज हो । वर्तमान गठबन्धन । अरु केही भएको छैन । बाधको छालामा स्यालको रजाईं गर्ने कुराले कोल्टो फेरेको छ । त्यति मात्रै भएको छ । कतिपयको लागि चार दिनको चाँदनी फेरि अँधेरी भएको हुनसक्छ । देश ठिक ढङ्गले अघि बढेको छ ।’

उहाँले काँग्रेस–एमाले गठबन्धनले लुकेर संविधान संशोधन गर्न लागेको भन्दै गरेको प्रचारमा कुनै सत्यता नभएको दाबी गर्नुभयो । उहाँले संविधान संशोधन लुकेर नगरिने बताउनु भयो ।