काठमाडौँ । नेपाली काँग्रेसका महामन्त्री विश्वप्रकाश शर्माले प्रधानमन्त्री केपी शर्मा ओलीको बारेमा विगतमा उठेका मुद्दामा काँग्रेस मौन नबस्ने बताउनुभएको छ ।
शनिवार काठमाडौंमा एक कार्यक्रमलाई सम्बोधन गर्दै उहाँले यस्तो बताउनुभएको हो । उहाँले प्रधानमन्त्री ओलीको नेतृत्वमा रहेको सरकारलाई सफल बनाउनका लागि काँग्रेसका सबैले साथ दिने बताउनु भयो । उहाँले काँग्रेसका सांसदहरु उभिएर विश्वासको मत दिएका कारण विगतमा उठेका प्रश्नलाई लुकाउने प्रयत्नमा काँग्रेस नलाग्ने बताउनु भयो ।
उहाँले सरकारले गर्ने कमजोरीमा आफूहरु मौन नबस्ने बताउनु भयो । उहाँले सरकार बनाउन १३८ भए पुग्ने भएपनि संविधान संशोधनका लागि १८४ सांसद संख्या चाहिने भएकाले सबै राजनीतिक दलहरुलाई सँगै लिएर अघि बढ्न अहिलेको सरकारले सक्नुपर्ने बताउनु भयो । काँग्रेस र एमालेले नेपाललाई एउटा नविन सम्भावनाको बाटोमा लैजानुपर्नेमा जोड दिनुभयो ।
उहाँले भन्नुभयो, ‘नेपालको सन्दर्भमा हामी अहिले वैकल्पिक राजनीति भन्दै गर्दा कम्युनिष्ट दर्शनले परिकल्पना गरेको चिज आजको सन्दर्भमा आउँदै गर्दा कहीँ न कहीँ मदन भण्डारीले भन्नुभएको बहुदलीय जनवादको बाटोमार्फतबाटै रुपान्तरणमा जाँदै गर्दा कम्युनिष्ट आन्दोलनले त्यो अपनाउँदा नेपालको समुन्नतिको सन्दर्भमा एउटा योगदान हुन्छ । अर्को बिर्सिनु नहुने तथ्य नेपालको कम्युनिष्ट आन्दोलनले बेला बेला अलि धङ्धङ्तीमा हुनुपर्छ वा बौद्धिकतामा हुनुपर्छ, वा आवेग, विचारमा हुनुपर्छ । के भनिदिनुहुन्छ भने कम्युनिष्ट आन्दोलनको निर्धारित कार्यभार पूरा भएको छैन । कार्यभार पूरा हुँदै गर्दा अमूर्त प्रकृतिको समाजवादको परिकल्पना बन्ने भन्दा नयाँ प्रकृतिको समाजवादको परिकल्पनामा जानुपर्छ भनेर डा. भट्टराईले भन्नुभएको सन्दर्भ यो पुस्तकमा रहेको छ । यो बेलामा नयाँ सरकार बनेको छ ।
नेपाललाई एउटा नविन सम्भावनाको बाटोमा लिएर जाँदै गर्दा दुई ठूला दल मिलेर सरकार बनाएको बेलामा कतै प्रतिपक्षीय स्वर पो कमजोर हुन्छन् की भनेर आम बौद्धिक क्षेत्रमा चिन्ता छ । प्रतिपक्षमा रहेको माओवादी खरो ढंगले नै प्रतिपक्ष बन्छ । बन्नुपर्छ । राष्ट्रिय स्वतन्त्र पार्टी पनि बन्नुपर्छ । कमरेड केपी ओलीको नेतृत्वमा रहेको सरकारलाई सफल बनाउनका लागि हामी काँग्रेसका सबैले नै साथ दिन्छौँ । तर उत्तिकै खरो भुमिकाका साथ प्रधानमन्त्रीजीलाई कुनै छुट हुनेछैन की काँग्रेसका सांसदहरु उभिएर विश्वासको मत दिएका छौँ । त्यसकारण तपाईंको बारेमा विगतमा उठाएका मुद्दा सबै थान्को लगाउँछौँ, त्यो बिल्कुल होइन ।
उहाँको सन्दर्भमा सरकारले गर्ने कमजोरीमा मौन बस्छौँ, त्यो पनि हुँदैन । दुई दलले हेक्का राख्नुपर्ने विषय यो छ की, हामी दुई दल नै मिलेर सरकार बनाउन सक्छौँ, १३८ भए पुग्छ, तर संविधान बदल्न, संशोधन गर्न १८४ चाहिन्छ । सबैको साथमा राम्रो सहकार्य गरेर जानसक्ने क्षमता अहिलेको नेतृत्वले गर्नुपर्छ ।’
महामन्त्री शर्माले प्रतिपक्षी दलहरु संसदमा सरकारका कामकारबाहीप्रति खरो रुपमा उभिनुपर्ने बताउनु भयो ।
