![](https://newspolar.com/wp-content/uploads/2024/06/prachanda-1-2-scaled.jpg)
काठमाडौं । प्रधानमन्त्री पुष्पकमल दाहाल ‘प्रचण्ड’ ले बाढीपहिरोले ठूलो धनजनको क्षति भइरहेको बेलामा प्रतिपक्ष दल सत्ता फेर्ने खेलमा लागेको बताउनुभएको छ । शुक्रबार प्रतिनिधिसभाको बैठकमा विश्वासको मत माग्दै उहाँले आफू विपद् न्यूनीकरणको लागि पहल गरिरहेको बताउनुभयो ।
उहाँले भन्नुभयो, ‘ यत्रो बाढीपहिरोले धनजनको ठूलो क्षति भइरहेको बेलामा हामी सरकार परिवर्तन प्रक्रियाभित्र प्रवेश गर्यौं । प्रतिपक्षका साथीहरूले साथीहरूले राजीनामाको कुरा उठाइराख्नुभयो । यस्तो बेलामा पनि सेना, प्रहरी, गृहप्रशासन सबैलाई राखेर क्षतिको रोकथाम गर्नेबारे पहल गरेको छु ।’
प्रधानमन्त्रीले आज बिहान पनि विश्वासको मत माग्ने कि नमाग्ने भन्नेबिच आफु दोधार भएको बताउनुभयो । उहाँले भन्नुभयो, ‘एक मनले त आज बिहान मैले विश्वासको मत माग्नु उचित हुन्छ होला कि हुन्न होला भनेर सोचेँ । तर मलाई लाग्छ, दुई ठूला दल सहमत भएर छिटोभन्दा छिटो सरकार बनाउन उद्यत भएको अवस्था छ । हिजो प्रमुख सचेतकमार्फत २ घन्टा सारौं भन्दा पनि नहुने देखेको र केही दिन सारौं भन्दा अर्को अर्थ लाग्ला भनेर सभामुखसँग आग्रह गरिनँ ।’