एजेन्सी । टी–२० विश्वकप २०२४ को सेमिफाइनलमा भारत र इंग्ल्याण्डबीच प्रतिस्पर्धा हुँदैछ । सेमिफाइनलमा दुवै टोली फेरि एकपटक आमने सामने हुनेछन् ।
भारतीय टोली जारी विश्वकपमा अहिलेसम्म अपराजित रहेको छ । अर्कोतर्फ समूह चरण र सुपर–८ मा इंग्ल्याण्डले एक–एक खेलमा हार बेहोरेको छ । रोहित शर्माको कप्तानीमा रहेको भारतले अष्ट्रेलियालाई २४ रनले हराएर सेमिफाइनलमा प्रवेश गरेको थियो भने इंग्ल्याण्डले अमेरिकालाई १० विकेटले पराजित गरेको थियो ।
खेल नेपाली समय अनुसार बेलुकी सवा ८ बजे गुयानाको प्रोभिडेन्स स्टेडियममा हुनेछ । यो खेलमा भारतले इङ्ल्यान्डसँग अघिल्लो पराजयको बदला लिने लक्ष्य लिएको छ ।
२०२२ को टी–२० विश्वकपमा इंग्लिस टोलीले सेमिफाइनलमा भारतलाई १० विकेटले पराजित गरेको थियो । तसर्थ भारत विगतका गल्तीबाट पाठ सिकेर इंग्ल्याण्डलाई हराउन चाहन्छ ।
भारत र इंग्ल्याण्डबीचको खेलमा वर्षाको छायाँ परेको छ । मौसमविदका अनुसार गुयानामा बिहानै पानी पर्ने सम्भावना ७० प्रतिशत रहेको छ । साथै, तापक्रम ३१ डिग्री सेल्सियसको आसपास रहने अनुमान गरिएको छ । यो खेलको विजेता टोली फाइनलमा प्रवेश गर्नेछ । तर, खेलको दिन वर्षा र हावाहुरीको सम्भावना छ । यस्तो अवस्थामा प्रतिस्पर्धा वर्षाको सिकार हुन सक्छ ।
टी–२० विश्वकप २०२४ मा भारत र इंग्ल्याण्डबीचको दोस्रो सेमिफाइनल खेल वर्षाका कारण रद्द भएमा त्यसको फाइदा भारतीय टिमलाई हुनेछ । भारतले समूह चरण र सुपर–८ मा सबै खेल जितेको छ । सुपर ८ मा भारतले तीनवटै खेल जितेको छ । उसको खातामा ६ अंक छ भने इंग्ल्याण्डको खातामा ४ अंक छ । यस आधारमा भारत सजिलै फाइनलमा पुग्ने छ ।
यो खेल गुयानाको प्रोभिडेन्स स्टेडियममा हुनेछ, जुन कम स्कोर र स्पिन मैत्री मैदान मानिन्छ । यसले फास्ट बलरलाई भन्दा स्पिनरहरूलाई धेरै मद्दत गर्दछ र ब्याट्सम्यानहरूलाई धेरै रन बनाउन धेरै संघर्ष गर्नुपरेको देखिन्छ ।
नकआउट खेलमा भारतीय टोली फेरि एकपटक रोहित शर्माको नेतृत्वमा जोस बटलरको नेतृत्व रहेको इंग्ल्याण्डसँग भिड्नेछ । टी–२० क्रिकेटमा यी दुई टोलीले २३ पटक भिडेका छन् जसमा भारतको अग्रता छ । भारतले १२ खेल जितेको छ भने इङ्ल्याण्डले ११ खेलमा जितको स्वाद चाखेको छ ।यस्तै, टी–२० विश्वकपको इतिहासमा इङ्ल्यान्डले भारतसँग चार पटक सामना गरेको छ । दुवै टोलीले दुई–दुई खेल जितेका छन् ।
